India Agriculture Export : इंडोनेशियाची भारतातील शेंगदाणा, गव्हावर करडी नजर

Pune News : मागील वर्षी भारतातून निर्यात झालेल्या काही शेतीमालात ॲफ्लाटाॅक्सीनची पातळी जास्त आढळून आली होती. त्यामुळे इंडोनेशियाने भारतातून आयात होणाऱ्या शेतीमालाची तपासणी अधिक कडक करण्याचा निर्णय घेतला. त्यातही शेंगदाणा आणि गव्हावर इंडोनेशियाचे करडी नजर असणार आहे. देशातील निर्यातदारांनी प्रक्रियेचे काटेकोर पालन करण्याचे आव्हान केले आहे.

इंडोनेशियाला भारतातून साधारण ५०० कोटी डाॅलर्स मूल्याची शेतीमाल निर्यात होत असते. त्यातही शेंगदाण्यासह तेलबिया निर्यातीचा वाटा जास्त आहे. एकूण शेतीमाल निर्यातीत २५ टक्क्यांपेक्षा अधिक वाटा तेलबियांचा आहे. तेलबियांची एकूण निर्यात २०२४-२५ मध्ये २७.३ कोटी डाॅलर्सची झाली होती. त्यानंतर मांस, डेअरी उत्पादने, तंबाखू आणि इतर शेतीमालाचा समावेश होता

अपेडाने म्हटले आहे, की मागील वर्षीत भारतातून निर्यात झालेल्या काही मालात ॲफ्लाटाॅक्सीनची पातळी जास्त आढळल्याचे इंडोनेशियाने म्हटले आहे. त्यामुळे इंडोनेशियाने तपासणी अधिक कडक करण्याचा निर्णय घेतला. त्यातही शेंगदाणा आणि गव्हाची तपासणी केली जाणार आहे. तसेच तपाणीत ॲफ्लाटाॅक्सीनची पातळी जास्त आढळली तर तो माल नाकारला जाईल, असेही इंडोनेशियाने कळवल्याचे अपेडाने म्हटले आहे.

भारतातून आयात होणाऱ्या भुईमूग आणि गव्हामधील अफ्लाटाॅक्सीन पातळीवर नियंत्रण ठेवण्यासाठी इंडोनेशियाने व्यवस्था उभारली आहे. इंडोनेशियाने एप्रिलच्या मध्यात भारतातून आयात होणाऱ्या शेतीमालामधील ॲफ्लाटाॅक्सीनची पातळी तपासण्यासाठी इंडोनेशियन क्वारंटाइन ऑथॉरिटीने १७ अन्न तपासणी प्रयोगशाळांची स्थापना केली आहे.

अपडाने देशातील प्रयोगशाळांना शेंगदाणा आणि शेंगदाणा उत्पादने निर्यात करताना सर्व प्रक्रियेचे काटेकोर पालन करण्याच्या सूचना केल्या आहेत. निर्यात करताना निकष, आवश्यकता आणि नमुना काढण्याची, तपासणीची आणि निर्यातीच्या प्रक्रियेचे पालन करण्यास सांगितले आहे. तसेच प्रयोगशाळांनी इंडोनेशियाने ठरवून दिलेल्या ॲफ्लाटाॅक्सीनच्या पातळीचे पालन करण्याच्याही सूचना दिल्या आहेत. तसेच शेतीमालाची निर्यात करताना कीटकनाशकांचे अवशेष आणि मायक्रोबायोलाॅजिकल निकषांचे पालन व्हावे, असेही अपेडाने म्हटले आहे.