Pune News: चालू वर्षात आतापर्यंत भारताची खाद्यतेल आयात कमी झाली आहे. पामतेल आणि सूर्यफुल तेलाची आयात कमी झाली तर सोयातेलाची आयात वाढली आहे. यापुढे सणांचा काळ असल्याने तेलाची मागणी जास्त असते. त्यातही पामतेलाचा प्रक्रिया उद्योगात वापर वाढतो. त्यामुळे पुढील काळात खाद्यतेलाची मागणी वाढू शकते, असा अंदाज आयातदारांनी व्यक्त केला.
मागील काही महिन्यांपासून खाद्यतेलाच्या भावात वाढ झाली आहे. त्यातही पामतेलाच्या दराला चांगला आधार मिळाला होता. त्यामुळे भारताची पामतेल आयात जुलै महिन्यात कमी झाली आहे. पामतेलाची आयात १० टक्क्यांनी कमी होऊन ८ लाख ५८ हजार टनांवर स्थिरावली. जुलै महिन्यातील पामतेलाची आयात गेल्या ११ महिन्यातील निचांकी पातळीवर पोचली आहे.
पामतेलाचे भाव वाढल्याने देशात मागणी कमी झाली होती. प्रक्रिया उद्योगात पामतेलाऐवजी राईस ब्रान तेलाचा वापर केला जात होता. जगातील सर्वात मोठ्या आयातदार भारताने पामतेलाची आयात कमी केल्यामुळे इंडोनेशिया आणि मलेशियात पामतेलाचे साठे वाढले आहेत. याचा परिणाम पामतेलाच्या दरावरही दिसून येत आहे.
सोयातेलाचे भाव इतर तेलाच्या तुलनेत कमी राहीले. त्यामुळे जूनच्या तुलनेत जुलै महिन्यात तब्बल ३८ टक्क्यांनी आयात वाढली आहे. सोयातेलाची आयात जवळपास ५ लाख टन झाली. एका महिन्यातील आयातीचा हा गेल्या तीन वर्षातील उच्चांक आहे. सोयातेलाची आयात वाढल्याने गुजरातमधील कांडला बंदरांवर व्हेसल्सची गर्दी झाली होती. सूर्यफुल तेलाची आयातही जुलै महिन्यात ७ टक्क्यांनी कमी होऊन २ लाख टनांवर स्थिरावली आहे.
पामतेल आणि आणि सूर्यफुल तेलाची आयात जुलै महिन्यात कमी झाली तरी सोयातेल आयातीचे प्रमाण वाढल्याने एकूण खाद्यतेल आयात वाढली आहे. जुलै महिन्यातील आयात १५ लाख ३ हजार टनांवर पोचली. जूनच्या तुलनेत ही आयात १.५ टक्क्यांनी जास्त होती. नोव्हेंबर २०२४ पासूनची ही सर्वाधिक आयात ठरली.
आयात वाढीसाठी प्रयत्न
देशात चालू वर्षात पहिल्या सहा महिन्यांमध्ये खाद्यतेल आयात सरासरीपेक्षा जळपास १ लाख टनाने कमी झाली आहे. यापुढील काळ आता सणांचा आहे. सणांमध्ये खाद्यतेलाला चांगली मागणी असते. ही मागणी पूर्ण करण्यासाठी सरकार यापुढील काळात खाद्यतेल आयात वाढीसाठी प्रयत्न करत आहे. त्यातही सणांमध्ये पामतेलाला जास्त मागणी असते. मिठाई आणि तळलेले पदार्थ तयार करण्यासाठी पामतेलाचा मोठ्या प्रमाणात वापर केला जातो. पामतेलाचे भाव जास्त असल्याने आयात कमी झाली होती. पण आता पामतेलाचे भाव कमी झाले आहेत. त्यामुळे यापुढील काळात पामतेलाची आयात वाढू शकते, असे आयातदारांनी सांगितले.
जैवइंधनामुळे दराला आधार
जागतिक बाजारात जैवइंधनासाठी खाद्यतेलाचा वापर वाढल्यामुळे दराला आधार मिळत आहे. जागतिक पातळीवर वर्षाला जेवढे खाद्यतेल उत्पादन होते त्यापैकी २१ टक्के उत्पादन जैवइंधनासाठी जाते. इंडोनेशियाने जैवइंधनात पामतेलाचा वापर वाढवला. यामुळे पामतेलाचे भाव वाढले होते. तसेच अमेरिका, ब्राझीलही खाद्यतेलाचा जैवइंधनात मोठा वापर करत आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.