Ginger Rate : आल्याला प्रतिक्विंटल ३२०० ते ४००० रुपये दर

Nagpur News : बाजारात आवक अधिक आणि मागणी अपेक्षित नसल्याच्या परिणामी आले (अद्रक) दर दबावात आले आहेत. आल्याला प्रतिक्विंटल ३२०० ते ४००० रुपयांचा दर मिळत आहे. मार्च-एप्रिल महिन्यांत या दरात काहीशी सुधारणा होत ते पाच हजारांवर जातील, अशी शक्‍यता वर्तविली जात आहे.

पश्‍चिम महाराष्ट्रातील सातारा जिल्ह्यात आले लागवड केली जात असून आल्याचे क्षेत्र तीन हजार हेक्टरपर्यंत आहे. तर १९१३ हेक्‍टर क्षेत्रावर हळद लागवड होते. त्यानंतर सांगली परिसरातही हळद लागवडीखालील १०० हेक्‍टरपेक्षा अधिक क्षेत्र असल्याचे सांगितले जाते. विदर्भासह उर्वरित महाराष्ट्रात देखील बाजारपेठेचा अंदाज घेत आले लागवडकर्ते शेतकरी आहेत.

त्यामध्ये बुलडाणा, वाशीम, अकोला हे जिल्हे आघाडीवर आहेत. २०२२-२३ या वर्षात आले दर उच्चांकी १४ हजार रुपयांवर पोहोचले होते. त्यानंतर दुसऱ्या वर्षी २०२३-२४ मध्ये आले दरात काहीशी घसरण होत ११ हजार रुपयांवर दर आले. यावर्षी ३२०० ते ४२०० रुपयांवर आले दर स्थिरावले आहेत.

बुलडाणा जिल्ह्यातील आले उत्पादक विठ्ठल धांडे यांनी दिलेल्या माहितीनुसार, सध्या बाजारात बेंगलोरमधील (कर्नाटक) आले आवक होत आहे. दिल्ली, राजस्थान या भागातही बंगलोरमधून आले पुरवठा होतो. त्या भागात यंदा चांगली उत्पादकता त्याबरोबरच गेल्या काही वर्षांत आले पिकाला मिळालेला चांगला दर यामुळे महाराष्ट्रातही आले पिकाखालील क्षेत्रात झालेली वाढ, अशी अनेक कारणे आले दर दबावात राहण्यामागे असल्याचे त्यांनी सांगितले.

अमरावती बाजारात १५० क्‍विंटल आवक

अमरावती बाजार समितीच्या सूत्रांनी दिलेल्या माहितीनुसार, या ठिकाणी रोज सरासरी १५० क्‍विंटल इतकी आले आवक होत आहे. बुधवारी (ता. १) आले दर ३२०० ते ४२०० रुपयांवर स्थिरावले होते.

आले साठविल्यास होईल फायदा

मे-जून महिन्यात लागवड केलेली असल्यास सप्टेंबरपासून आले काढणीस येते. त्या वेळी बाजारात नवा, जुना माल अशी विभागणी होत दर दिले जातात. त्यामुळे बाजाराचा अंदाज घेत काही महिने आले जमिनीत ठेवल्यास वाढीव दराच्या माध्यमातून फायदा होतो, असे विठ्ठल धांडे सांगतात. जमिनीत राहिल्यास आले वर्षानुवर्षे खराब होत नाही.