Flower Rate : गणेशोत्सवाच्या काळात फुलांच्या दरात तेजी

Nashik News : गणेशोत्सव काळात गणपती सजावट व गौरींच्या सजावटीसाठी विविध प्रकारच्या रंगीबेरंगी फुलांची बाजारात सध्या मागणी वाढली आहे. मात्र पावसामुळे सध्या उत्पादनात घट झाल्याने तुलनेत फुलांची आवक मर्यादित आहे. या मागणीमुळे सध्या बाजारात तेजी दिसून येत आहे.

ऑगस्टच्या अखेरीस झालेल्या पावसामुळे झेंडू, शेवंती यासह गुलाब फुलशेतीचे नुकसान झाले आहे. त्यामुळे उत्पादन कमी आल्याचे पाहायला मिळत आहे. त्यातच गणेशोत्सवाला बाजारात मर्यादित आवक होत असल्याने व तुलनेत मागणी वाढल्याने सध्या दरात सुधारणा झाल्याचे नाशिकमधील गणेश वाडी फूल बाजारात पाहायला मिळत आहे.

झेंडू, शेवंती, गुलाब, जरबेरा, निशिगंध अशा फुलांचा आकर्षकपणा या गुणधर्ममुळेही शोभिवंत फुलांचा वापर मोठ्या प्रमाणात होत आहे. त्यात सणासुदीला मागणी वाढल्याने फूल व्यवसायाला चांगले दिवस आहेत. सध्या अनेक मंडळांकडून फुलांची आकर्षक सजावट या घरात गणेशोत्सवात सजावट होत असल्याने फुलांची मागणी वाढत असून त्यातून रोजगारनिर्मिती होत असल्याचे दिसून येत आहे.

शेवंती, झेंडूला सर्वाधिक मागणी

झेंडू व शेवंतीच्या फुलांना सर्वाधिक मागणी आहे. सध्या फूल उत्पादक शेतकऱ्यांना बाजारात सरासरी ५०० ते ६०० रुपये प्रतिक्रेट असा दर मिळत आहे. तर किलोला १०० ते दीडशे रुपयांपर्यंत आहे. गणेशोत्सवाच्या सुरुवातीला दर ८०० रुपये क्रेटपर्यंत होते. गुलाबदरातही तेजी होती.

किरकोळ विक्री दर असे (रुपये किलो) :

शेवंती ३५० ते ४००

झेंडू २५० ते ३००

सुटा पाकळी गुलाब ३०० ते ३५०

मोगरा १२०० ते १४००

निशिगंध ८०० ते १०००

सोनचाफा ७ रुपये नग

जर्बेरा १० फुलांचे बंडल २०० रुपये

निशिगंध १० कड्यांचे बंडल २०० रुपये

देशी गुलाब १२ फुले बंडल ३० ते ५०

रंगीत पॉलिहाऊस गुलाब

२० फुले बंडल १५० ते २०० रुपये