Bedana Market : शेतकऱ्यांनी दराअभावी बेदाणा विक्री थांबविली

Sangli News : यंदाच्या नवीन बेदाण्याची आवक बाजारात होत असून उठावही चांगला होत आहे. मात्र बेदाण्याला दर अपेक्षित मिळत नसल्याने शेतकरी हवालदिल झाला आहे. सध्या बेदाण्याला सरासरी ११० ते १७० रुपये असा दर आहे. उत्पादन खर्च वाढल्याने या दराने बेदाणा विक्री करून कसे परवडणार, असा प्रश्‍न बेदाणा उत्पादकांना पडला आहे. त्यामुळे शेतकऱ्यांनी बेदाणा विक्री थांबविली आहे.

यंदा द्राक्ष हंगामाच्या वेळी अवकाळी पाऊस झाला. त्यातच करपाजन्य आणि बुरशीजन्य रोगामुळे द्राक्ष बागांचे नुकसान झाले. त्यामुळे शेतकऱ्यांनी बेदाणा उत्पादनासाठी पुढाकार घेतला नाही. त्यातच हंगामाच्या प्रारंभापासून बेदाण्याचे दर टिकून होते. गेल्या २० ते २५ दिवसांपासून बाजारात बेदाण्याची आवक वाढू लागली आहे.

सध्या सांगली, तासगाव आणि पंढरपूर या तिन्ही बाजार समित्यांत सौद्याला होळीच्या पार्श्‍वभूमीवर गेल्या १५ दिवसांपूर्वी तीन हजार टनांहून अधिक आवक होती. होळीनिमित्त खरेदी अंतिम टप्प्यात आली असल्याने गेल्या आठवड्यापासून बेदाण्याची आवक दोन हजार टन आहे.

दरम्यान, फेब्रुवारीत बेदाण्याला ११० ते १४० रुपये असा दर होता. होळीनिमित्त बेदाण्याला मागणी असल्याने दरात प्रति किलोस १५ ते २० रुपयांनी सुधारणा झाली होती. व्यापारी म्हणतात, ‘‘बेदाण्याला मागणी चांगली असून उठावही होत आहे. त्यामुळे गेल्या १५ ते २० दिवसांपूर्वी बेदाण्याच्या दरात प्रतिकिलोस १० ते १५ रुपयांनी वाढ झाली. सध्या बेदाण्याला १२० ते २३० रुपये असा दर आहे. बेदाण्याच्या दर्जानुसार प्रतिकिलोस २३० रुपये असा दर आहे.’’

दराबाबत संभ्रमावस्था

शेतकरी म्हणाले, की बाजार समितीत व्यापारी बेदाण्याला उच्चांकी दर जाहीर करतात. त्यामुळे शेतकरी बेदाणा विक्रीसाठी येतात, परंतु त्या ठिकाणी दर्जेदार म्हणजे एक नंबरचा बेदाणा हा कमी असतो. त्याला उच्चांकी दर मिळतो. बहुतांश मालाला दर कमी मिळतो. त्यामुळे नुकसान होते. त्यामुळे व्यापाऱ्यांकडून जाहीर केलेल्या दरांबाबत संभ्रमावस्था आहे.

तासगाव बाजार समितीने दराबाबत सांगितले, की यंदाच्या नव्या बेदाण्याचे दर वाढले असून दर टिकून आहेत. परंतु बेदाण्याला प्रति किलोस मिळणारा २३० रुपये हा दर क्वचितच मिळत आहे. त्यामुळे सांगली, तासगाव, पंढरपूर या बाजार समित्यांत बेदाण्याची आवक कमी झाली आहे.