Tur Procurement : नाफेडच्या तूर नोंदणीकडे शेतकऱ्यांची पाठ

Latur News : राज्य शासनाच्या हमीभाव खरेदी केंद्रावर नोंदणी करूनही अनेक शेतकऱ्यांची सोयाबीन खरेदी झाली नाही. त्यामुळे अगोदरच शेतकऱ्यात असंतोष आहे. त्यात शासनाने हमी भावाप्रमाणे तुरीची खरेदी केंद्र सुरु करण्यासाठी नोंदणी प्रक्रिया सुरु केली आहे. याची मुदत ता. २४ मार्च रोजी संपत आहे.

गेल्या दोन महिन्यात जिल्ह्यात शासनाच्या हमी भाव खरेदी केंद्रासाठी केवळ ६९५ शेतकऱ्यांनी नोंद केली आहे. त्यामुळे शासनाच्या तूर खरेदी नोंदणीकडे शेतकऱ्यांनी पाठ फिरवल्याचे दिसून येत आहे. या वर्षी शासनाने सोयाबीन खरेदी केंद्र सुरु केले होते. या करिता देखील शेतकऱ्यांची नोंदणी करण्यात आली होती. अत्यंत कासवगतीने ही सोयाबीन खरेदी झाली.

बारदाना नसल्याने अनेक दिवस खरेदी बंद राहिली. याचा फटका नोंदणी करूनही शेतकऱ्यांचे सोयबीन शासनाने खरेदी केले नाही. यात मराठवाड्यात अडीच लाख शेतकऱ्यांना शासनाने वाऱ्यावर सोडले होते. सोयाबीन पाठोपाठ आता शासनाने हमी भावाने तुरीची खरेदी करण्यासाठी प्रक्रिया सुरु केली आहे.

२४ जानेवारी ते ता. २४ मार्च या कालावधीत शेतकऱ्यांची नोंदणी करून घेतली जात आहे. ही मुदत संपण्यासाठी केवळ तीन दिवसच शिल्लक राहिले आहेत.जिल्ह्यात नाफेडच्या वतीने १९ खरेदी केंद्र सुरु करण्यात येणार आहेत. पण याकरिता आतापर्यंत केवळ ६९५ शेतकऱ्यांनीच नोंदणी केली आहे. त्यामुळे या शासनाच्या खरेदीकडे शेतकऱ्यांनी पाठ फिरवल्याचे चित्र दिसत आहे.