Eggs Rate : हिंदी भाषकांचा श्रावण सुरू; अंडी दर दबावात

Nagpur News : हिंदी भाषकांचा श्रावण सुरू होताच अंड्यांच्या दरात घट सुरू झाली आहे. गेल्या तीन दिवसांपूर्वी ५५० रुपये प्रतिशेकडा या दराने अंड्यांचे व्यवहार होत असताना आता मात्र दरात १०० रुपयांची घट नोंदविण्यात आली आहे. ४५० रुपये प्रतिशेकडा दर अंड्याला मिळत आहे. यातून उत्पादकता खर्चाची भरपाई देखील होत नसल्याचे व्यावसायिकांनी सांगितले.

राज्याची रोजची अंडी मागणी एक कोटींच्या घरात आहे. राज्यभरातील लेअर पोल्ट्री व्यवसायिकांकडून त्याची पूर्तता होत नसल्याने हैदराबादसह देशातील इतर राज्यांतून देखील अंड्यांची आयात होते. त्यामुळेच गेल्या महिनाभरापासून अंडी दरात चांगलीच सुधारणा अनुभवली जात होती.

सरासरी ५५० रुपये प्रतिशेकड्यावर अंड्यांचे दर पोहचले होते. यापुढील काळात अंड्यांचे दर ६०० रुपयांवर जातील, अशी शक्‍यता या क्षेत्रातील जाणकारांकडून वर्तविण्यात आली होती. मात्र हिंदी भाषिक पट्ट्यात सुरू झालेल्या श्रावण महिन्यामुळे दरवाढीला खीळ बसली आहे. त्यामुळे अवघ्या दोनच दिवसांत अंड्यांच्या दरात तब्बल १०० रुपयांची घट झाली. ५५० रुपयांवरून थेट ४५० रुपये प्रतिशेकडा दर सध्या मिळत आहे.

दरम्यान, पुढील काळात मराठी भाषकांचा देखील श्रावण सुरू होईल. या काळात अंडी मागणीत आणखी घट होण्याची शक्‍यता वर्तविली जात आहे. विशेष म्हणजे हैदराबादमधून आवक होणाऱ्या अंड्यांची विक्री ५३० रुपये शेकडा याप्रमाणे होत आहे.

त्या भागात स्थानिक सरकारकडून वीज दरात सवलत, पशुखाद्याच्या पुरवठ्यात सवलत मिळते. त्यामुळे त्यांचा प्रतिनग अंडी उत्पादकता खर्चही कमी होतो. त्यामुळे राज्याच्या इतर भागातून आवक होणाऱ्या अंड्यांचे दर कमी राहतात, असेही सांगण्यात आले.

दरवाढीमुळे चिंता वाढली

मक्‍याचा तुटवडा निर्माण झाल्याने २२०० रुपये क्‍विंटलचे दर वाढत २५००, २६५० आणि आता थेट २९०० रुपयांवर पोहचले आहेत. त्यामुळे पोल्ट्री व्यावसायिकांचा उत्पादकता खर्च वाढून अंडी दरात मात्र घट झाली आहे. परिणामी हे व्यावसायिक संकटात आहेत.