Nagpur News : पोल्ट्री, कापड आणि इथेनॉल उद्योगाची वाढती मागणी त्या तुलनेत देशांतर्गत असलेली कमी उत्पादकता या कारणामुळे मक्‍याचा तुटवडा निर्माण झाला आहे. देशातील काही भागात मका प्रतिक्‍विंटल ३००० रुपयांवर पोहचला असून महाराष्ट्रात देखील मक्‍याचे व्यवहार २७०० ते २९०० रुपयांनी होत आहेत.
देशात दरवर्षी सुमारे ३५० ते ३८० लाख टन मका उत्पादन होते. तर दुसरीकडे देशांतर्गत मका मागणी ४०० लाख टन आहे. त्यामुळे दरवर्षी थोड्याफार प्रमाणात मक्‍याचा तुटवडा निर्माण होतो, असे या क्षेत्रातील जाणकार सांगतात. बिहार सरकारने जैवइंधनाला प्रोत्साहन दिले आहे. त्यामुळे बिहारमध्येच मक्‍याला मागणी वाढली आहे. बिहार राज्यात १७ ते १८ रुपये किलो दर होता. परंतु मागणी वाढल्याने दर २२ ते २३ रुपये प्रतिकिलोवर पोचले आहेत.
इथेनॉल त्यासोबतच जैव इंधनासाठी मका वापर वाढल्याने त्याचा थेट फटका कुक्‍कुटपालन व्यवसायाला बसला आहे. महाराष्ट्रातील बाजार समित्यांमध्ये मक्‍याचे व्यवहार २२०० ते २८०० रुपये क्‍विंटलने होत आहेत. कुक्‍कुटपालकांना याची विक्री २७०० ते २९०० रुपये क्‍विंटलने होत आहे.
तयार पशुखाद्याचे दरही सरासरी २० टक्‍क्‍यांनी वाढले आहेत. त्यामुळे लेअर आणि ब्रॉयलर पोल्ट्री व्यवसायिकांसमोरील अडचणीत वाढ झाली आहे. पशुखाद्यातील वाढीच्या तुलनेत ब्रॉयलर पक्षी आणि अंडी दरात वाढ होत नसल्यामुळे उत्पादकता खर्चाची भरपाई कशी करावी, असा प्रश्‍न व्यवसायिकांसमोर आहे.
खरीप, रब्बीतही मका
खरीप आणि रब्बी हे दोन मुख्य हंगाम असले तरी देशातील काही भागात वर्षभर मका लागवडीचा पॅटर्न राबविला जातो. त्यामुळे मागणी आणि पुरवठ्याची साखळी बऱ्याअंशी पूर्ण होते. पावसाळ्याच्या पहिल्या टप्प्यात दरवर्षी बिहारमधील मका देशभराची गरज पूर्ण करतो.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.