Kolhapur News : सध्या येथील बाजारपेठेत गुळाच्या आवकेत वाढ झाली आहे. आवक वाढल्‍याने दर क्विंटलला १०० ते २०० रुपयांनी कमी झाले आहेत. दर कमी असले तरी श्रावणाच्या पार्श्वभूमीवर दर फारसे घसरणार नाहीत अशी शक्यता आहे. सध्या गुजरातमधील व्यापाऱ्यांची शीतगृहे रिकामी झाल्याने गुळाला रोजची मागणी आहे.
येणाऱ्या कालावधीत खरेदीत वाढ होण्‍याची शक्यता असल्याने गुळाचे दर क्विंटलला ४००० रुपयांच्या वरच राहतील, अशी शक्यता आहे. सध्या बाजार समितीत दररोज सुमारे ७००० रव्यांची आवक होत आहे. सध्या पावसाचा अडथळा नसल्‍याने गूळनिर्मिती दररोज सुरू आहे. यामुळे गुळाच्या आवकेत वाढ होत असल्‍याचे बाजार समितीच्‍या सूत्रांनी सांगितले.
जुलैच्या उत्तरार्धात पाऊस सुरू झाल्याने गुळाची आवक एकदम कमी झाली होती. सध्या नियमित हंगाम नसल्‍याने मार्चपासून गूळ सौदे एक दिवसाआडच होत आहेत. जुलैमध्ये ४००० ते ५००० गूळ रवे बाजार समितीत येत होते. गुळाची आवक कमी झाल्याने दरातही वाढ होती. या कालावधीत गुळाचे दर ४३०० रुपयांपर्यंत गेले होते. ऑगस्टच्या उत्तरार्धापासून मात्र परिस्थिती बदलली. ऊन पडल्‍याने गुऱ्हाळे सुरू करण्यासाठी पोषक हवामान तयार झाले.
यामुळे बंद असलेली काही गुऱ्हाळेही सुरू झाली. गुळाच्या आवकेत हळूहळू वाढ होत राहिली. मागणी स्थिरच असल्याने गेल्या पंधरा दिवसांत दरात क्विंटलला १०० ते २०० रुपयांची घसरण झाली. सध्या वाढीव नसली तरी श्रावणामुळे दररोजची मागणी आहे. यामुळे खरेदी केलेला गूळ तातडीने गुजरातला जात आहे. येत्या काही दिवसांत गणेशोत्सवाच्या पाश्‍वर्भूमीवर स्थानिक मागणी वाढेल असा अंदाज आहे. यामुळे गूळ दराची विशेष घसरण होणार नाही, अशी शक्यता आहे.
सध्या गुजरातमधील ९५ टक्क्यांहून अधिक शीतगृहे रिकामी झाली आहेत. पंधरवड्यापूर्वी सणांच्या पार्श्वभूमीवर तेथील व्‍यापाऱ्यांनी शीतगृहातील सगळ्या गुळाची विक्री केली. यामुळे व्यापाऱ्यांना गुळाची गरज लागत आहे. कोल्हापूरबरोबर कर्नाटकातूनही गुळाची उपलब्धता व्यापाऱ्यांकडून करण्यात येत आहे. नियमित मागणी असल्याने गूळ दर फार कमी होतील ही शक्यता सध्या तरी नसल्याचे गूळ उद्योगातून सांगण्यात आले.
२ सप्‍टेंबरची गुळाची स्थिती अशी (दर प्रति क्विंटल, रुपये)
गूळ प्रत कमीत कमी ते जास्तीत जास्‍त सरासरी
२ ४२०० ते ४४०० ४३००
३ ३७५० ते ४९९० ३९००
४ ३५७० ते ३७४० ३६५०
१ किलो ३७०० ते ४३०० ४०००
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
