Cotton Procurement : ‘सीसीआय’ने खरेदी केला ३३ लाख गाठी कापूस

Pune News : कॉटन कॉर्पोरेशन ऑफ इंडियाकडे (सीसीआय) सध्या कापसाचा चांगला स्टॉक आहे. सीसीआयने आतापर्यंत ३२.८५ लाख गाठींची खरेदी केली. कापसाची गुणवत्ता चांगली असल्याने ‘सीसीआय’च्या कापसला बाजारभावापेक्षा चांगला भाव मिळत आहे. ‘सीसीआय’ कस्तुरी कॉटन भारत या ब्रॅंडखाली कापसाची विक्री करत आहे, अशी माहिती ‘सीसीआय’चे अध्यक्ष ललित कुमार गुप्ता यांनी दिली.

सीसीआयचे गुप्ता यांनी सांगितले, की आतापर्यंत सीसीआयने जवळपास ३२.८५ लाख गाठी कापसाची खरेदी केली. त्यापैकी एकट्या तेलंगणातच २४ लाख गाठींची खरेदी करण्यात आली. त्यानंतर महाराष्ट्रात २.४४ लाख गाठी खरेदी झाली. तर आंध्र प्रदेशात १ लाख ३० हजार गाठी आणि मध्य प्रदेशात १ लाख २७ हजार गाठी कापूस सीसीआयने खेरदी केला. तर उतर्वरित खरेदी इतर राज्यांमध्ये झाली.

सीसीआयची कापूस खरेदी फेब्रुवारीपासून कमी झाल्याचे गुप्ता यांनी स्पष्ट केले. बाजारभाव हमीभावापेक्षा जास्त झाल्यानंतर शेतकऱ्यांनी सीसीआयला कापूस विक्री थांबवली. त्यामुळे सीसीआयला कापूस मिळत नाही. तरीही सीसीआयची केंद्रे सुरू आहेत. सीसीआयची शेवटची खरेदी ४ मार्च रोजी झाली होती. सध्या बाजारात सरासरी ७५०० के ७८०० रुपयांच्या दरम्यान भाव मिळत आहे. हा भाव हमीभावापेक्षा ७ ते ८ टक्के जास्त आहे.

‘सीसीआय’चे अध्यक्ष म्हणाले..

- बाजारातील कापूस आवक ८० हजार ते १ लाख गाठींच्या दरम्यान

- देशात रोजचा वापर ८५ हजार गाठींच्या दरम्यान होतो

- सीसीआयने कस्तुरी कॉटन भारत या ब्रँडखाली कापसाची विक्री सुरू केली

- सीसीआयने चांगल्या गुणवत्तेचा कापूस खरेदी केला

- सीसीआयच्या कापूस गाठींची गुणवत्ता चांगली

- बाजारभावापेक्षा सीसीआयच्या कापूस गाठींना जास्त भाव

सीसीआयचा भाव महत्त्वाचा

अडचणीत आल्याचे कारण देत देशातील उद्योग सीसीआयकडे कमी भावात कापसाची मागणी करत असतात. मागे अनेकदा याचा अनुभव आला आहे. पण सीसीआय यंदा कमी भावात कापूस विक्री करण्याची शक्यता कमीच आहे. कारण सध्या सुतगिरण्या, कापड उद्योग, जिनिंग यांना फायदा होत आहे. विशेष म्हणजे सीसीआयच्या कापसाची गुणवत्ता चांगली आहे. सीसीआयच्या कापसाचेही भाव जास्त असल्याने बाजारभावाला आधार मिळेल, असे अभ्यासकांनी सांगितले.