Carrot Price: गाजराचे दर उंचावले! सरासरी २००० रुपये क्‍विंटलवर पोहोचले

Yavatmal News: किरकोळ बाजारात ४० रुपये किलो दराने विक्री होत असलेल्या गाजराची घाऊक विक्री २० ते २५ रुपये किलोप्रमाणे होत आहे. महागाव तालुक्‍यातील माडकिन्ही गावात गाजर लागवड होते. या भागातील शेतकऱ्यांनी गेल्या वर्षीच्या तुलनेत या वर्षी दर काहीसे समाधानकारक असल्याचे सांगितले.

तालुक्‍यातील माडकिन्ही गावात १० ते १२ एकरांवर गाजर लागवड होते. ऑक्‍टोबर महिन्यात लागवड करून सक्रांतीपूर्वी बाजारात आवक होईल, असा उद्देश असतो. परंतु यंदा सोयाबीन काढणीच्यावेळी व नंतर देखील पावसाची संततधार सुरू होती. त्यामुळे गाजर लागवडीचा हंगाम काहीसा लांबणीवर पडला.

परिणामी सक्रांतीऐवजी आता गाजर काढणीस येत असल्याची माहिती शेतकरी माधव कांदे यांनी दिली. त्यामुळे वाढीव दराचा फायदा यंदा मिळू शकला नाही. सक्रांतीच्यावेळी मागणी वाढती असल्याने ३० ते ३५ रुपये किलोचा दर मिळतो. सध्या गाजराची विक्री २० ते २५ रुपये किलोप्रमाणे होत आहे.

गेल्या वर्षी याच कालावधीत गाजराचे दर अवघे १५ रुपये किलो असे होते. साडेतीन महिने कालावधीचे पीक आहे. यंदा मार्चपर्यंत याची उत्पादकता होईल. एका एकरातून सरासरी १५० ते २०० क्‍विंटलची उत्पादकता होते.

बाजारात पूर्वी ५० किलोच्या पोत्यामध्ये माल पाठविण्यावर भर होता. आता व्यापाऱ्यांकडून २६ ते २७ किलोच्या प्लॅस्टीक पिशवीच्या पॅकिंगमध्ये मागणी राहते. त्यानुसार माल पॅकिंग करून पाठविला जातो. मागणीत वाढ झाल्यास यापुढील काळात दरात काहीशी तेजी राहील, असा अंदाज शेतकरी माधव कांदे यांनी व्यक्‍त केला आहे.

अमरावती बाजारात गाजाराची नियमित १५० क्‍विंटलपेक्षा अधिकची आवक होत आहे. या बाजारातील व्यापारी सूत्रांनी दिलेल्या माहितीनुसार, गाजराला १६०० ते १८०० रुपये क्‍विंटलचा दर मिळत आहे. नागपूरच्या कळमना बाजाराचा विचार करता या ठिकाणच्या गाजराची आवक ९०० क्‍विंटलवर पोहचली आहे.

नागपूर बाजार समितीत आवक होणाऱ्या गाजराला एक ते १३ जानेवारी या कालावधीत १८०० ते २२०० रुपये क्‍विंटलचा दर मिळाला. आता मात्र मागणीत घट झाल्याने गाजराचे दर १२०० ते १४०० रुपये क्‍विंटलवर आले आहेत. आवक सुध्दा पूर्वीच्या ९०० क्‍विंटलवरून १०० क्‍विंटलने कमी होत ८०० क्‍विंटलवर आली आहे, असे व्यापारी सूत्रांनी सांगितले.