Jalgaon News : देशातून मागील पाच ते सात दिवसांत केळीची आखातातील निर्यात निम्म्यावर आली आहे. निर्यातक्षम केळीची आवक कमी झालेली असून, देशांतर्गत किंवा उत्तरेकडे हंगामी फळांची रेलचेल संपल्याने केळीच्या दरात दुप्पट वाढ किंवा चांगली सुधारणा झाली आहे.
केळीचे दर खानदेशात मागील सात दिवसात ११०० ते १२५० रुपये प्रतिक्विंटलवरून २००० ते २५०० रुपये प्रतिक्विंटल, असे झाले आहेत. निर्यातीच्या केळीला कमाल २५०० रुपये प्रतिक्विंटलचा दर आहे.
हा दर जूनमध्ये सरासरी १३०० रुपये प्रतिक्विंटल असा होता. केळीची आवक खानदेशात निम्म्यापेक्षा कमी झाली आहे. जूनमध्ये जळगाव जिल्ह्यातून उत्तर भारत व देशांतर्गत बाजारात प्रतिदिन सरासरी ३०० ट्रक (एक ट्रक १६ टन क्षमता) केळीची पाठवणूक झाली. पण या महिन्यात किंवा मागील काही दिवसांत ही पाठवणूक प्रतिदिन १२५ ट्रक एवढीच होत आहे.
आगाप लागवडीच्या केळी बागांमधील केळीची काढणी पूर्ण झाली आहे. जळगावमधील रावेर, मुक्ताईनगर, यावल भागात केळीची आवक निम्म्यापेक्षा अधिक घटली आहे. तर चोपडा, पाचोरा, जामनेर या भागात सध्या केळी काढणीवर नाही. नंदुरबारमधील शहादा, तळोदा भागातही केळीची आवक निम्म्यापेक्षा कमी झाली आहे.
उत्तर भारतात उठाव कायम
सध्या श्रावणासंबंधी उत्तर भारतात केळीला मागणी आहे. तेथील बाजारात आंबा कमी दिसत आहे. उत्तर भारतात नेपाळमधून कलिंगड, खरबूज येत होते. त्याची आवकही घटली आहे. उपवासाचे दिवस आहेत. यातच केळीची मागणी काश्मीर, पंजाब, दिल्ली, हरियाना येथे चांगली आहे. यामुळे केळीचे दर वधारले आहेत. राज्यातही नागपूर, ठाणे, मुंबई, कल्याण भागात केळीला मागणी वाढली आहे.
निर्यातही निम्म्यावर
देशातून सध्या सोलापूर, जळगाव, नंदुरबार, थेनी (तमिळनाडू) येथून केळीची आखातात पाठवणूक सुरू आहे. पण सोलापुरातून निर्यात कमी झाली आहे. तेथून सध्या रोज ३० (एक कंटेनर २० टन क्षमता) कंटेनर केळीची पाठवणूक आखातात सुरू आहे.
सोलापुरातून मागील महिन्यात प्रतिदिन ६० ते ७० कंटेनर केळीची पाठवणूक रोज आखातात सुरू होती. खानदेशातूनही निर्यात घटली आहे. मागील महिन्यात प्रतिदिन २० कंटेनर केळीची पाठवणूक जळगाव जिल्ह्यातून आखातात सुरू होती.
ती सध्या फक्त तीन कंटेनर एवढी आहे. देशात सध्या राजपिपला, आणंद (गुजरात), बऱ्हाणपूर (मध्य प्रदेश) व जळगाव, नांदेड सोलापुरात केळी उपलब्ध आहे. आंध्र प्रदेशातून आवक अद्याप सुरू झालेली नाही. तेथून नोव्हेंबरमध्ये केळीची आवक सुरू होईल.
परिणामी केळीचे दर पुढेही स्थिर राहतील, अशी माहिती जाणकारांनी दिली. देशातून सध्या फक्त ४० ते ४१ कंटेनर केळीची आखातात किंवा परदेशात पाठवणूक सुरू आहे. जूननध्ये देशातून प्रतिदिन सरासरी ११० कंटेनर केळीची परदेशात पाठणूक झाल्याची माहिती मिळाली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.