Banana Market : खानदेशात केळीची आवक घटली

Jalgaon News : खानदेशात केळीच्या आवकेत मागील आठवड्यात आणखी घट झाली आहे. यातच उत्तरेकडे थंडी व अन्य अडचणींमुळे बाजारात फारशी सुधारणा दिसत नसल्याची स्थिती आहे. दरात नरमाई दिसत असून, दर्जेदार किंवा निर्यातक्षम केळीला १८०० रुपये प्रतिक्विंटलचा दर आहे. तर किमान दर १०००, १४०० ते १७०० रुपये प्रतिक्विंटल, असा आहे.

किमान दरात आवक कमी असल्याने घसरण झालेली नाही. सध्या काश्मिरात पाठवणुकीच्या केळीचे दर क्विंटलमागे १७५० ते १८०० रुपये प्रतिक्विंटल, असे दिले जात आहेत.
काश्मिरात मागील थंडी व बर्फवृष्टी सुरू आहे.

यामुळे तेथील बाजारावर परिणाम झाला असून, केळीची तेथील मागणी या आठवड्यात कमी झाली आहे. तेथील बाजार पूर्ववत झाल्यानंतर केळी दरात सुधारणा होईल, असे सांगण्यात आले. मागील वर्षीदेखील डिसेंबरमध्ये केळी दरात घसरण झाली होती.

खानदेशात सध्या प्रतिदिन ४० ते ४२ ट्रक (एक ट्रक १६ टन क्षमता) केळीची आवक होत आहे. आवकेत मागील आठ ते १० दिवसांत सुमारे १५ ट्रकने घट झाली आहे. मागील वर्षी डिसेंबर, जानेवारीत लागवड केलेल्या केळी बागांत काढणी सुरू आहे. सर्वाधिक आवक जळगाव जिल्ह्यातील चोपडा, जळगाव, जामनेर, रावेर, यावल व मुक्ताईनगर भागांत होत आहे. तसेच धुळ्यातील शिरपूर, नंदुरबारातील शहादा, तळोदा व अक्कलकुवा भागांतही केळीची आवक होत आहे. पण आवक अल्प आहे.

बऱ्हाणपुरातही कमी आवक

मध्य प्रदेशातील बऱ्हाणपूर येथे सोमवारी (ता.२) २१ ट्रक (आठ ते १६ टन क्षमता) केळीची आवक झाली. तेथे केळीला कमाल १६१८ व किमान ९२१ रुपये प्रतिक्विंटलचा दर मिळाला. तेथील आवकेतही मोठी घट मागील सात ते आठ दिवसांत झाली आहे.