Parbhani Cotton Procurement : परभणी बाजार समितीतील कापूस लिलाव खरेदी २१ जूनपासून बंद

Parbhani News : परभणी कृषी उत्पन्न बाजार समितीच्या टीएमसी कॉटन मार्केट यार्डावर खासगी व्यापाऱ्यांमार्फत यंदाच्या (२०२२-२३) हंगामात जाहीर लिलावाद्वारे होणारी कापूस खरेदी सुरू आहे. मोसमी पावसाचे आगमन होणार आहे.

कॉटन मार्केट यार्डावर तसेच जिनिंगमध्ये कापूस साठवणुकीसाठी निवारे (शेड) सुविधा नाहीत. त्यामुळे बुधवारी (ता. २१) कापूस खरेदी बंद करण्यात येणार आहे.

शेतकऱ्यांनी मंगळवार (ता. २०)पर्यंत कापूस विक्रीसाठी आवाहन बाजार समितीतर्फे करण्यात आले आहे.

परभणी कृषी उत्पन्न बाजार समितीच्या टीएमसी कॉटन मार्केट यार्डावर नोव्हेंबर महिन्यात जाहीर लिलावाद्वारे कापूस खरेदीस सुरू झाली. आजवर सुमारे दीड लाख क्विंटल कापसाची खरेदी झाली.

बाजार समिती यार्डावर कापूस घेऊन आलेली वाहने थांबण्यासाठी निवारे नाहीत. कार्यक्षेत्रात यंदा सुरू असलेल्या जिनिंगमध्ये देखील निवारे नाहीत. त्यामुळे पावसामुळे कापूस भिजून कापसाची प्रतवारी खराब होऊन कमी दर मिळण्याची शक्यता नाकारता येत नाही.

यंदाच्या हंगामात कापसाच्या बाजाराभावात चढ-उतार होत आहेत. परभणी बाजार समिती शेतकऱ्यांच्या हितासाठी सदैव तत्पर आहे. शेतकऱ्यांनी शेतीमालाची प्रतवारी करुन आणल्यास बाजारभावाबाबत कोणतीही तक्रार उद्‍भविणार नाही. दरवाढीच्या अपेक्षेने अनेक शेतकऱ्यांकडे अजून कापूस शिल्लक आहे.