Cashew Market : परवाना नसताना काजू बी खरेदी? आता होणार कडक कारवाई

Sindhudurga News : जिल्ह्यातील काजू बी खरेदी करणाऱ्या व्यापाऱ्यांनी काजू बी खरेदीकरिता आवश्यक परवाना घेऊनच खरेदी करावी, अन्यथा कारवाई करण्याचा निर्णय कृषी उत्पन्न बाजार समितीच्या वतीने घेण्यात आला आहे.

यावर्षीचा काजू हंगाम सुरू झाला आहे. काजू बी ला चांगला दर मिळावा याकरिता कृषी उत्पन्न बाजार समिती प्रयत्नशील आहे. परंतु जिल्ह्यातील अनेक आठवडा बाजारात व्यापारी कोणताही परवाना नसताना काजू बी खरेदी करतात. त्यामुळे शेतकऱ्यांचे नुकसान होते. विक्रीची कोणतीही पावती शेतकऱ्याला दिली जात नाही.

त्यामुळे शासनाकडून शेतकऱ्याला अनुदान देताना अनेक अडचणी निर्माण होतात. त्यामुळे कृषी उत्पन्न बाजार समितीने यावर्षी बाजार समितीचा परवाना घेऊनच व्यापाऱ्यानी काजू बीची खरेदी करावी.

विनापरवाना काजू बी खरेदी करणाऱ्या व्यापाऱ्यांवर कायदेशीर कारवाई करण्याची तयारी कृषी उत्पन्न समितीने दर्शविली आहे. त्यामुळे काजू उत्पादकांनी देखील परवाना असलेल्या व्यापाऱ्यांकडेच काजू बी ची विक्री करावी, असे आवाहन देखील समितीकडून करण्यात आले आहे.