Chandrapur News : आंतरराष्ट्रीय स्तरावर कापसाच्या दरात होणाऱ्या घसरणीमुळे भारतीय बाजारात कापसाचे दर हमीभावापेक्षा कमी असल्याचे चित्र आहे. सध्या कापसाला ६९०० ते ७१०० रुपयांचा दर मिळत असून हमीभावाच्या तुलनेत क्‍विंटलमागे ४०० ते ५०० रुपये असे शेतकऱ्यांचे नुकसान होत आहे. भारतीय बाजारातील कापसाची प्रत चांगली असून येत्या काळात मागणी वाढल्यास कापसाच्या दरात सुधारणा होईल, अशी शक्‍यता विपणन क्षेत्रातील जाणकार व्यक्‍त करतात.
केंद्र सरकारने कापसाला ७५२१ रुपयांचा हमीभाव जाहीर केला आहे. बाजारात मात्र कापसाचे दर दबावात असून ६९०० ते ७१०० रुपयांनी व्यवहार होत आहेत. कापूस विपणन क्षेत्राचे अभ्यासक विजय जावंधिया यांच्या मते जागतिक बाजारात ८० सेंट एक पाउंड रुई (५० ते ५२ हजार रुपये खंडी) असा दर आहे.
भारतीय बाजारात सरकीचे भाव ४००० रुपयांवरून ३२०० ते ३३०० रुपये क्‍विंटलपर्यंत खाली आले आहेत. त्याचा परिणाम सरकी ढेपेच्या दरावरही झाला आहे. सरकी ढेप (पेंड) भाव ३२०० वरुन २८०० रुपयांवर घसरल्याचे चित्र बाजारात आहे. येत्या काळात सरकीची आवक वाढल्यास त्यात आणखी घसरण होईल. त्यामुळे सरकी ढेपही दबावात राहण्याची भीती असल्याने त्याचा थेट परिणाम कापसाच्या दरावर होणार असल्याचे जावंधिया यांनी सांगितले.
सध्या भारतीय बाजारात ६९०० ते ७१०० रुपयांनी कापसाचे व्यवहार होत आहेत. वरोरा परिसरात मोठ्या प्रमाणावर जिनींग असून त्यांच्याद्वारे सध्या कापसाची खरेदी होत आहे. एका जिनींग व्यावसायिकाकडे रोज सरासरी ३५० क्‍विंटल कापसाची आवक होत असल्याचे सांगण्यात आले. या ठिकाणी कापसाला ६९०० ते ७१०० रुपयांचा दर मिळत असल्याची माहिती व्यावसायिकांनी दिली.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.