lumpy skin disease : ‘लम्पी स्कीन’चा खानदेशात प्रादुर्भाव वाढला

जळगाव ः खानदेशात ‘लम्पी स्कीन’ (lumpy skin disease) आजाराचा पशुधनातील प्रकोप वाढला आहे. पशुधन विलगीकरणाची सुविधा कुठेही नाही. स्वतंत्र छावण्यांची गावोगावी गरज आहे. यातच लसींचा तुटवडा आहे. शासनाकडून कुठेही पुरेशी लसींची व्यवस्था झालेली नसल्याची स्थिती आहे.

लम्पी स्कीन जळगावमधील रावेर, यावल, पारोळा, अमळनेर, धुळ्यातील साक्री, धुळे, शिरपूर, नंदुरबारमधील नवापूर भागात अधिक आहे. या भागात गावोगावी किंवा महसूल मंडलांत दोन पशुधन छावण्या किंवा विलगीकरण कक्ष तयार करण्याची गरज आहे. संसर्ग झालेल्या पशुधनाचे लसीकरण शक्य नाही. परंतु संसर्ग न झालेल्या पशुधनाचा बचाव करण्यासाठी विलगीकरण, जनजागृतीची गरज आहे. त्यासाठी लसीकरणही गावोगावी वेगात सुरू करण्याची गरज आहे. परंतु लसीकरण गावोगावी सरपंच किंवा दात्यांकडून केले जात आहे. प्रशासनाकडे लसींचा तुटवडा आहे. जिल्हा परिषदेचा पशुसंवर्धन विभाग ही समस्या रोखण्यास अपयशी ठरला आहे. पर्यवेक्षक, पशुवैद्यक यांची संख्या कमी आहे. यामुळे शेतकऱ्यांना खासगी पशुवैद्यकांच्या मदतीने लसीकरण करून घ्यावे लागत आहे.

खानदेशात सध्या पशुधनाचे बाजार बंद आहेत. परंतु बाजार सुरू असतानाच या रोगाचा फैलाव गावोगावी झाला. हा फैलाव रोखण्यासाठी उपचार वाढविण्यासह सक्षम यंत्रणेची गरज आहे. परंतु यंत्रणेचा अभाव असल्याने शेतकऱ्यांमध्ये नाराजी आहे. यातच पावसाचा धुमाकूळ सुरू असल्याने पिकांची हानी होत आहे. दुसरीकडे गोठ्यात पशुधनाची हानी होत आहे.खानदेशात ‘लम्पी स्कीन’च्या समस्येने आतापर्यंत सुमारे ५० पशुधन मृत्यूमुखी पडले आहे. नुकसानग्रस्त शेतकऱ्यांना तातडीने शासनाकडून मदतीची गरज आहे. परंतु मदत अद्याप काही शेतकऱ्यांनाच मिळाली आहे.