Lumpy Skin : ‘लम्पी’बाधित जनावरांत वासरांची संख्या जास्त

Nagar News : नगरसह राज्यातील बहुतांश भागात लम्पी स्कीन रोगाचा प्रादुर्भाव होत आहे. राज्यात १ जून पासून आजपर्यंत २८१ तालुक्यांतील २ हजार ८६१ गावांत सुमारे एक लाख जनावरे लम्पीने बाधित झाली आहेत. त्यातील ७१ हजार जनावरे बरी झाली. मात्र बाधित जनावरांत सुमारे २५ ते ३० टक्के वासरे आहेत.

जूनपासून या आजाराचे प्रमाण अधिक वाढले आहे. लम्पीची साथ आटोक्यात आणण्यासाठी जनावरांचे बाजार, चारा वाहतूक, पशुप्रदर्शने, जनावरांचे संबंधित उत्सव बंद ठेवण्याचे आदेश देण्यात आले. याशिवाय गायवर्गीय जनावरे, चारा वाहतुकीस निर्बंध घातले आहेत. बाधित भागात पशुधनाची ऑनलाइन खरेदी-विक्रीही बंद केली आहे.

बाधित भागातून बाधित प्राण्यांच्या संपर्कात आलेली कोणत्याही प्रकारची वैरण, प्राण्यांच्या निवाऱ्यासाठी असलेले गवत किंवा अन्य साहित्य आणि अशा प्राण्यांचे शव, कातडी, अन्य कोणताही भाग, उत्पादन, असे प्राणी नियंत्रित क्षेत्राच्या बाहेर नेण्यासाठी बंदी घातली आहे.

बाधित परिसरात स्वच्छता ठेवून व निर्जंतुक द्रावणाची फवारणी करून निर्जंतुकीकरण करावे, ‘लम्पी स्किन’चा विषाणू वीर्यामधूनही बाहेर पडत असल्याने वीर्यमात्रा बनविणाऱ्या संस्थांमार्फत होणारे वीर्य संकलन थांबवले आहे.

नगर जिल्‍ह्याचा विचार केला तर यंदा जिल्ह्यात ४ हजार ३९३ जनावरांना लम्पीची बाधा झाली आहे. त्यात ३२२० जनावरे आजारातून बरी झाली आहेत. तर २६२ जनावरांचा मृत्यू झाला. बाधित जनावरांत सुमारे १११० वासरे आहेत. त्यातील ७६८ वासरे या आजारातून बरी झालेली आहेत. पशुसंवर्धन विभागाने वासरांच्या मृत्यूचा आकडा निश्चित केलेला नसला तरी यंदा पहिल्यांदाच बाधित वासरांची संख्या वाढली आहे.

१ जूनपासून नगर जिल्ह्यातील तालुकानिहाय बाधित वासरे

अकोले ः १२, जामखेड ः ६, कर्जत ः १४, कोपरगाव ः १४३, नगर ः ६०, नेवासा ः १२०, पारनेर ः २८, पाथर्डी ः १०५, राहाता ः ५३, राहुरी ः २८१, संगमनेर ः ७, शेवगाव ः ९२, श्रीगोंदा ः १६२, श्रीरामपूर ः २६