बैल बाजारात दोनच दिवसात सहाशे बैलांची विक्री

तळोदा, जि. नंदुरबार : येथील ग्रामदैवत कालिका मातेच्या यात्रोत्सवात भरलेल्या बैलबाजारात दोनच दिवसांत सहाशे बैलांची विक्री झाली असून, त्यातून जवळपास ७० लाखांची उलाढाल झाली असल्याची माहिती कृषी उत्पन्न बाजार समितीच्या सूत्रांनी दिली. त्यामुळे बैल बाजारात खरेदीदारांमध्ये उत्साह असल्याचे चित्र आहे. शेतकऱ्यांनी मोठ्या प्रमाणावर खरेदीसाठी गर्दी केली होती. त्यामुळे बैल बाजाराची उलाढाल अजून वाढण्याची शक्यता वर्तवली जात आहे.

खानदेशात प्रसिद्ध असलेल्या तळोदा शहरातील यात्रोत्सवातील बैल बाजारात एक हजार ते बाराशे बैल विक्रीसाठी आणण्यात आले होते. शेतकऱ्यांची बैल खरेदीसाठी यात्रेला नेहमीच पसंती असते. जून महिन्यात खरीप हंगाम सुरू होत असल्याने शेतकरी येथूनच बैलाची खरेदी-विक्री खरेदी करण्याचे पसंत करतात.

गुजरात, मध्य प्रदेश, राजस्थान या राज्यातील तसेच जळगाव, धुळे, नंदुरबार येथील व्यापाऱ्यांनी बैलजोडी विक्रीसाठी आणले आहेत. सातपुडा पर्वतात उताराच्या जमिनीवर चालू शकणाऱ्या बैलांची देखील येथे मोठ्या प्रमाणावर खरेदी विक्री होते. त्यामुळे सातपुड्यातील शेतकऱ्यांनी देखील हजेरी लावली आहे. बैलांची विक्रीसाठी संख्या बघता चारा विक्रीतून मोठा रोजगार मिळाला आहे. कृषी उत्पन्न बाजार समितीने सोयीसुविधा पुरविल्या आहेत.