Goat-Sheep Farming Project : शेळी-मेंढी समूह प्रकल्पासाठी पारनेरमधील ढवळपुरीची निवड

Nagar News : महाराष्ट्राच्या ग्रामीण अर्थव्यवस्थेमध्ये शेळीपालनास महत्त्वाचे स्थान आहे. शेळीपालन (Goat Farming) हा शेतीपूरक व्यवसाय म्हणून फायदेशीर ठरलेला आहे.

नगर जिल्ह्यातील पारनेर तालुक्यातील ढवळपुरी येथे शेळी-मेंढी समूह प्रकल्प व पुण्यश्‍लोक अहिल्यादेवी महाराष्ट्र मेंढी व शेळी विकास महामंडळाच्या या नवीन प्रक्षेत्राचा महाराष्ट्रदिनी (ता. १ मे) प्रारंभ होणार आहे.

शेतीला पूरक व्यवसाय म्हणून शेळी-मेंढी पालनाकडे पाहिले जाते. राज्यातील शेतकरी मोठ्या प्रमाणात शेळी-मेंढी पालन करतात.

त्या पार्श्‍वभूमीवर पालकांच्या समस्या सुटाव्यात यासाठी पारनेर तालुक्यातील ढवळपुरी येथे महसूल व पशुसंवर्धनमंत्री राधाकृष्ण विखे पाटील यांच्या पुढाकारातून पुण्यश्‍लोक अहिल्यादेवी महाराष्ट्र मेंढी व शेळी विकास महामंडळाचा शेळी-मेंढी समूह प्रकल्प मंजूर झाला आहे.

त्या संदर्भात मंत्रालयात मंत्री राधाकृष्ण विखे-पाटील यांच्या अध्यक्षतेखाली पुण्यश्‍लोक अहिल्यादेवी महाराष्ट्र मेंढी व शेळी विकास महामंडळाची आढावा बैठक घेण्यात आली.

प्रधान सचिव जगदीशप्रसाद गुप्ता, नाशिक विभागीय आयुक्त राधाकृष्ण गमे, नगरचे जिल्हाधिकारी सिद्धाराम सालीमठ, पुण्यश्‍लोक अहिल्यादेवी महाराष्ट्र मेंढी व शेळी विकास महामंडळाचे व्यवस्थापकीय संचालक डॉ. शशांक कांबळे उपस्थित होते.

राज्यामध्ये समूह विकासामधून शेळी-मेंढीपालन व्यवसायास गती देऊन शेळी- मेंढीपालन संबंधित नवीन उद्योजक निर्माण करणे.

शेतकऱ्यांचे समूह तयार करून त्या माध्यमातून त्यांना शेळी-मेंढीपालन व्यवसायाकरिता प्रवृत्त करून त्यांचे या व्यवसाया बाबतचे कौशल्य विकसित करणे व त्यांच्यामध्ये स्वयंरोजगार निर्मिती होऊन त्यांचे आर्थिक व सामाजिक जीवनमान उंचविण्यास यामुळे मदत होणार आहे.

या भागातील शेळी-मेंढीपालकांना सतत निर्माण होणारा शेळ्या व मेंढ्यांच्या विपणन व्यवस्थेचा प्रश्‍नही सुटणार आहे.

या प्रकल्पांतर्गत शेळ्या- मेंढ्यापासून मिळणाऱ्या विविध पदार्थ व उपपदार्थ यांचे प्रक्रिया उद्योग उभारण्यात येणार असल्यामुळे मोठ्या प्रमाणात नवीन उद्योजक निर्माण होऊन रोजगार निर्मिती सुद्धा होईल. नगर जिल्ह्यामध्ये शेळी उद्योगाच्या माध्यमातून शाश्‍वत विकास साध्य करता येणार आहे.