Livestock Census : सिंधुदुर्गातील १५६ गावांतील पशुगणनेचे काम पूर्ण

Sindhudurg News : जिल्ह्यात नोव्हेंबर अखेरपासून पशुगणनेचे काम सुरू असून आतापर्यंत ८८७ पैकी १५६ गावांतील गणनेचे काम पूर्ण झाले असून, ५५२ गावांमध्ये पशुगणनेचे काम सुरू आहे. दरम्यान, अजूनही १७९ गावांमध्ये काम सुरू झालेले नाही.

सिंधुदुर्गात २५ नोव्हेंबरपासून पशुगणनेचे काम सुरू झाले आहे. एकूण ८८७ महसूल गावे असून आतापर्यंत केवळ १५६ गावांमधील गणनेचे काम पूर्ण झाले आहे. याशिवाय सद्यःस्थितीत ५५२ गावांमध्ये काम सुरू आहे.

मात्र अजूनही १७९ गावांमध्ये कामच सुरू झालेले नाही. साधारणपणे २८ फेब्रुवारीपर्यंत पशुगणनेचे काम पूर्ण करण्याच्या सूचना शासनपातळीवरून देण्यात आलेल्या आहेत. पशुगणना करण्यासाठी ९२ प्रगणक,१८ पर्यवेक्षक, असे ११० कर्मचारी नियुक्त करण्यात आले आहेत.

पशुगणनेमध्ये गाय, म्हैस, डुक्कर, कोंबड्या, मेंढ्या, शेळ्या, भटके कुत्रे आदी प्रवर्गातील जनावरांची पशुगणना केली जात आहे. यापूर्वी केलेल्या पशुगणनेत सिंधुदुर्गात १ लाख ८८ हजार ९९ पशुधन होते. यामध्ये गायवर्ग १ लाख ५ हजार ५०८,म्हैस ५१ हजार १८०,मेंढ्या-१५,शेळ्या ३ हजार ३२,डुक्कर-१ हजार ३६४ या पशुधनांचा समावेश होता.