Milk Production : उन्हाळ्यातही कशी झाली दुग्धोत्पादनात वाढ?

Mangao News : दूध उत्पादन (Milk Production) करणाऱ्या शेतकऱ्यांनी शेतामध्ये जानेवारी महिन्यात मका-ज्वारी इत्यादी हिरवा पाला देणाऱ्या पिकांची पेरणी केली होती. उन्हाळ्यात ही पिके बहरली असून, या हिरव्या चाऱ्याचा उपयोग दूध देणाऱ्या जनावरांना खाद्य म्हणून केला जात आहे.

त्‍यामुळे ऐन उन्हाळ्यातही दुधाच्या उत्पादनात घट झाली नसून, चांगले दुग्धोत्पादन होत आहे. यामुळे शेतकरी सुखावले आहेत.

उन्हाळ्यात दुग्धोत्पादन करणाऱ्या शेतकऱ्यांना गुरांच्या हिरव्या चाऱ्याची चिंता सतावेत असते. ऐन उन्हाळ्यात गुरांना हिरवा चारा उपलब्ध होत नसल्याने दूध उत्पादनात लक्षणीय घट होते. दुग्ध उत्पादनात होणारी घट भरून काढण्याचा शेतकऱ्यांचा नेहमीच प्रयत्न असतो. उन्हाळ्यात सुका पेंढा व इतर खाद्यान्न उपलब्ध होते.

मात्र, यामुळे दूध उत्पादनात वाढ होत नाही. या दुधाची घट भरून काढण्यासाठी तालुक्यातील दूध उत्पादन करणाऱ्या शेतकऱ्यांनी जानेवारी महिन्यात मका-ज्वारीची पेरणी केली होती.

ऐन उन्हाळ्यात ही पिके बहरली असल्याने गुरांना हिरवा चारा उपलब्ध झाला आहे. या चाऱ्याचा उपयोग दूध देणाऱ्या जनावरांना खाद्य म्हणून केला जात असल्याने चांगले दुग्धोत्पादन होत आहे. यामुळे शेतकरी सुखावले आहेत. स्वतःच्या किंवा भाड्याने घेतलेल्या शेतीमध्ये उन्हाळी दिवसात मका, ज्वारीचे पीक फक्त गुरांना खाद्य म्हणून घेतले जात आहे.

काही एकर जागेवर शेतकऱ्यांनी मका, ज्वारीचे पीक घेतले असून, या हिरव्या चाऱ्याचा उपयोग दूध उत्पादन वाढीसाठी होत असल्याचे शेतकऱ्यांनी सांगितले आहे.