Animal Vaccination : जनावरांच्या लसीकरणामुळे टळले आजारांचे संकट

Jalgaon News : हिवाळ्यापूर्वी जनावरांना विविध आजारांची लागण होऊ नये, यासाठी पशुवैद्यकीय विभागातर्फे लसीकरण केले जाते. चाळीसगाव तालुक्यात जनावरांना विशेषतः लाळखुरकत रोगाची लागण होण्याची शक्यता लक्षात घेता, ४५ दिवसांत तब्बल एक लाख २४ हजार जनावरांचे १०० टक्के लसीकरण करण्यात आल्याची माहिती येथील पशुवैद्यकीय विभागाने दिली.

लाळखुरकत रोगाच्या प्रादुर्भावाने जनावरांचा मृत्यू होण्याची भीती असते. शिवाय, गाय व म्हैस यांसारख्या जनावरांच्या दुधात घट होण्याची भीती असते. त्यामुळे वर्षातून दोन वेळा ही प्रतिबंधक लस देण्याचे नियोजन पशुवैद्यकीय विभागाने केले आहे.

गुरांना लाळ खुरकत या विषाणूजन्य आजाराची लागण झाल्यानंतर उद्भवणारा धोका लक्षात घेता, लसीकरणाची मोहीम तालुक्यात राबविण्यात आली. गायी व म्हशींना येथील पशुवैद्यकीय दवाखान्यातून लसीकरण करण्याची व्यवस्था करण्यात आली होती. याशिवाय ठिकठिकाणच्या गुरांच्या दवाखान्यातही लसीकरणाचे नियोजन करण्यात आले.

त्यामुळे अवघ्या ४५ दिवसांत १०० टक्के लसीकरण झाल्याचा दावा तालुका पशुधन अधिकारी डॉ. संदीप भट यांनी केला आहे. लाळ खुरकत रोग हा आर्थिक नुकसान करणारा रोग असल्याने वेळेत प्रतिबंधात्मक उपाय करणे गरजेचे असल्याचे त्यांनी सांगितले.

दरम्यान, गुरांचे लसीकरण झाल्यानंतर त्यांना पुरेशी सावली असलेल्या ठिकाणी बांधावे. त्यांना भरपूर पाणी पाजावे, बैलांना एक दिवस विश्रांती द्यावी, कामाला जुपू नये असेही डॉ. भट यांनी ‘सकाळ’शी बोलतांना सांगितले.

वर्षातून दोन वेळा लसीकरण

चाळीसगाव तालुक्यातील जनावरांसाठी लाळखुरकत या विषाणूजन्य आजाराच्या एक लाख २८ हजार ७०० प्रतिबंधात्मक लस शासनाकडून प्राप्त झाल्या होत्या. म्हैस व गायवर्गीय जनावरांना ४५ दिवसांच्या कालावधीत तालुक्यातील सर्व शासकीय पशुवैद्यकीय रुग्णालयांतून तसेच खासगी पशुवैद्यकीय अधिकारी असे एकूण २२ कर्मचाऱ्यांच्या माध्यमातून जनावरांचे लसीकरण करण्यात आले. यात एक लाख ७०० गायींना, तर २३ हजार ३०० म्हशींना लस देण्यात आली.