Red Kandhari Conservation : ‘लाल कंधारी’ प्रक्षेत्रास जाती संवर्धन पुरस्कार

Parbhani News : परभणी येथील पशुवैद्यक व पशुविज्ञान महाविद्यालयातील लाल कंधारी संशोधन प्रक्षेत्रास लाल कंधारी गोवंश संवर्धनासाठी भारतीय कृषी संशोधन परिषद (आयसीएआर) अंतर्गत कर्नाल (हरियाना) येथील राष्ट्रीय पशू आनुवंशिक संसाधने विभागाचा ‘जाती संवर्धन पुरस्कार २०२३’ जाहीर झाला आहे. शनिवारी (ता. २३) किसानदिनी आयोजित कार्यक्रमात हा पुरस्कार प्रदान करण्यात येणार आहे.

परभणी येथील पशुवैद्यक व पशुविज्ञान महाविद्यालयामार्फत लाल कंधारी या बहुउद्देशीय देशी गोवंशाची प्रजनन व दूध उत्पादन क्षमता वाढावी, या दृष्टीने संशोधन केले जाते. प्रक्षेत्रावर मागील ५१ वर्षांपासून लाल कंधारी वंशाच्या शुद्ध जातीचे जतन केले जाते.

या गोवंशाच्या संवर्धन आणि प्रसारासाठी पशुपालकांमध्ये जनजागृती व्हावी, यासाठी विविध उपक्रम राबविले जातात. नॅशनल ब्यूरो ऑफ अॅनिमल जेनेटिक रिसोर्सेस या संस्थेकडून लाल कंधारी गोवंशाला ‘इंडिया कॅटल ११००-आरके-०३२४’ हा राष्ट्रीय स्तरावरील नोंदणी क्रमांक मिळाला आहे.

रेतमात्रा निर्मितीसाठी राज्य शासनाच्या पशुसंवर्धन विभागास लाल कंधारी वळू पुरविले जातात. महाविद्यालयाचे सहयोगी अधिष्ठाता डॉ. बाबासाहेब नरळदकर, संशोधन उपसंचालक डॉ. सुहास अमृतकर, प्रक्षेत्र व्यवस्थापक डॉ. श्रीनिवास कटकुरी, डॉ. तुकाराम भुक्तार यांनी कुलगुरू डॉ. नितिन पाटील, संशोधन संचालक डॉ. नितिन कुरकुरे, अधिष्ठाता डॉ. शिरिष उपाध्ये, विस्तार शिक्षण संचालक डॉ. अनिल भिकाने, महाविद्यालयाचे निवृत्त सहयोगी अधिष्ठाता डॉ. नितिन मार्कंडेय यांच्या मार्गदर्शनाखाली या पुरस्कारासाठी नामांकन दाखल करण्यात आले होते.