Lumpy Skin : राजापुरात ४१ जनावरे लम्पी बाधित

Ratnagiri News : गेल्या तीन-चार महिन्यांपासून थैमान घालणाऱ्या आणि जनावरांत प्रादुर्भाव झालेल्या लम्पी स्कीन या त्वचा आजाराने तालुक्यात पुन्हा डोके वर काढले आहे. गेल्या काही दिवसांमध्ये सहा जनावरे मृत्यूमुखी पडली आहेत तर, ४१ जनावरे लम्पी स्कीन बाधित आहेत. १६ जनावरे बरी झाली आहेत.

जानेवारी-फेब्रुवारीत लम्पी स्कीनचा संसर्ग वाढला होता. त्या काळामध्ये तालुक्यातील दीडशेहून अधिक जनावरे बाधित होती. प्रादुर्भाव रोखण्यासाठी पशुवैद्यकीय विभागाकडून उपाययोजना करण्यात आल्या. आजाराला प्रतिबंध करणारी लसही टोचण्यात आली. त्यामुळे तालुक्यात लम्पी स्कीन आजार काहीसा आटोक्यात आला.

त्यानंतर, गेल्या काही दिवसांपासून पुन्हा एकदा आजाराने डोके वर काढले आहे. तालुक्यातील विविध भागांतील गावांमधील ६७ जनावरांत गेल्या काही दिवसांमध्ये आजाराचा प्रादुर्भाव झाला आहे. त्यापैकी सद्यःस्थितीत ६ जनावरे मृत्यूमुखी पडल्याची माहिती तालुक्याचे पशुवैद्यकीय अधिकारी किनरे यांनी दिली.

तर १६ जनावरे उपाचाराअंती बरी झाली असून, अद्याप ४१ जनावरे बाधित आहेत. मृत्यूमुखी पडलेल्या जनावरांच्या मालकांना शासनाकडून नुकसान भरपाईपोटी मदत केली जाणार आहे.

त्यामध्ये गायीसाठी ३० हजार, बैलासाठी २५ हजार आणि लहान वासरासाठी १६ हजार रुपये अनुदानाचा समावेश आहे. आजाराचा संसर्ग होऊन मृत्यूमुखी पडलेल्या २० जनावरांच्या मालकांनी शासनाकडे प्रस्ताव सादर केले आहेत.