Lumpy Skin : सातारा जिल्ह्यात २२ जनावरे ‘लम्पी स्कीन’ बाधित

Satara News : जिल्ह्यात लम्पी स्कीन आजाराचा प्रादुर्भाव वाढत असून कऱ्हाड, फलटण, कोरेगाव व माण तालुक्यांत आजाराने बाधित २२ जनावरे आढळून आली. आजाराने डोके वर काढले असून काले (ता. कऱ्हाड) येथील कालवडीचा मृत्यू झाला. या पार्श्‍वभूमीवर जिल्हा परिषदेचा पशुसंवर्धन विभागाच्या वतीने प्रादुर्भाव रोखण्यासाठी उपाययोजना केल्या जात आहेत.

गेल्या वर्षी जिल्ह्यात लम्पी स्कीनचा प्रादुर्भाव मोठ्या प्रमाणात वाढला होता. जिल्हा पशुसंवर्धन विभाग लम्पी स्कीनचा प्रादुर्भाव रोखण्यात यशस्वी झाला, तरी शेतकऱ्यांचे मोठे नुकसान झाले होते. त्या पार्श्‍वभूमीवर राज्य सरकारने नुकसानग्रस्तांना आर्थिक मदतही दिली होती. गेल्या काही दिवसांत लम्पी स्कीनचा प्रादुर्भाव पुन्हा वाढू लागला आहे.

कऱ्हाड तालुक्यात तीन गावांमधील १७ जनावरे, फलटण व माण तालुक्यात प्रत्येकी एक व कोरेगाव तालुक्यात तीन अशी २२ जनावरे बाधित आढळून आली आहेत. बाधित जनावरांच्या ठिकाणापासून पाच किलोमीटर परिसरातील जनावरांचे लसीकरण करण्यात येत आहे. प्रादुर्भाव रोखण्यासाठी शिरवळ पशुवैद्यकीय महाविद्यालयातील वैद्यकीय अधिकारी व पशुसंवर्धनचे वैद्यकीय अधिकारी यांचे पथक तयार केले आहे.