Pune News : बंगालच्या उपसागरात दाना चक्रीवादळाची निर्मिती झाली. हे चक्रीवादळ ओडिशा आणि पश्चिम बंगालच्या दरम्यान उद्या मध्य रात्रीनंतर जमिनीवर येण्याची शक्यता आहे. राज्याला या चक्रीवादळाचा फटका बसणार नाही. तर राज्यात आज आणि उद्या काही ठिकाणी हलक्या ते मध्यम पावसाचा अंदाज हवामान विभागाने दिला.

पूर्वमध्य बंगालच्या उपसागरात काल निर्माण झालेल्या तीव्र दाब क्षेत्राचे रुपांतर दाना चक्रीवादळात झाले आहे. दाना चक्रीवादळ ईशान्य दिशेने १५ किलोमीटर प्रतितास वेगाने प्रवास करत आहे. हे चक्रीवादळ ओडिशातील पारादिपपासून आग्नेय दिशेला ५२० किलोमीटर, पश्चिम बंगालमधील दक्षिण आग्नेयला ६०० किलोमीटर आणि बांगलदेशमधील खेपूपुरा येथून दक्षिण आग्नेयला ६१० किलोमीटर अंतरावर होते.

दाना चक्रीवादळाचा प्रवास ईशान्य दिशेने होत आहे. तर या चक्रीवादळाचे रुपांतर उद्या सकाळी तीव्र चक्रीवादळात होणार आहे. हे चक्रीवादळ उत्तर ओडिशा आणि पश्चिम बंगालची किनारपट्टी पुरी आणि सागर बेटाच्या दरम्यान ओडिशातील भितारकणिका आणि धमारा येथे उद्या रात्री आणि शुक्रवारी सकाळी पार करण्याची शक्यता आहे. यावेळी १०० ते ११० किलोमीटर प्रतितास वेगाने वारे वाहण्याचा अंदाज आहे.

तर राज्यातील काही भागात आज आणि उद्या पावसाचा अंदाज हवामान विभागाने दिला आहे. हवामान विभागाने आज राज्यातील कोकण, मध्य महाराष्ट्र, मराठवाडा आणि विदर्भात काही ठिकाणी हलक्या ते मध्यम पावसाचा अंदाज दिला. कोकणातील पालघर आणि मुंबई वगळता सर्व जिल्हे, नंदूरबार आणि धुळे वगळता मध्य महाराष्ट्रातील सर्व जिल्हे, मराठवाड्यातील सर्व जिल्हे आणि विदर्भातील बुलडाणा, अकोला, अमरावती, वर्धा आण वाशीम जिल्ह्यात काही ठिकाणी विजा आणि ढगांच्या गडगडाटासह हलक्या ते मध्यम पावसाचा येलो अलर्ट दिला.

उद्या कोकणातील सिंधुदूर्ग आणि रत्नागिरी तर मध्य महाराष्ट्रातील कोल्हापूरस, सातारा आणि सांगली जिल्ह्यात काही ठिकाणी हलक्या ते मध्यम पावसाचा येलो अलर्ट हवामान विभागाने दिला. तर रायगड, ठाणे, पुणे, नाशिक, नगर, धाराशिव, बीड, नांदेड आणि लातूर जिल्ह्यातही काही ठिकाणी हलक्या पावसाचा अंदाज हवामान विभागाने दिला.