Pune News: पुणे शहरात आणि जुन्नर तालुक्याच्या काही भागात जोरदार वाऱ्यासह गारपीट झाली आहे. अनेक ठिकाणी झाडे पडली असून पिकांचे नुकसान झाले आहे. मागील काही दिवसांपासून उन्हाच्या झळा तीव्र झाल्या आहेत. तुरळक पावसाने थोडा दिलासा मिळाला आहे. आकाश ढगाळ झाले होते. सायंकाळच्या सुमारास काही भागात तुरळक तर काही ठिकाणी मध्यम प्रकारचा पाऊस झाला आहे.

या पावसाचा फटका भाजीपाला पिकांना बसणार आहे. चार-पाच दिवस असेच वातावरण राहिल्यास पिकांवर रोगराई पडून पिकांचे नुकसान होण्याची शक्यता असल्याने चिंतेचे वातावरण आहे. काही ठिकाणी बटाटे काढण्याचे काम सुरू आहे. तर कांदा चाळीतून कांदा पिशव्यात भरण्याचे काम सुरू असल्यामुळे या तुरळक पावसामुळे शेतकऱ्यांची धांदल उडाली आहे.

हवेली तालुक्यातील शिवाजीनगर व उपनगर भागात दुपारी पाच वाजेच्या दरम्यान जोरदार पाऊस झाला. नवी सांगवी, औंध, निगडी, पिंपरी, चिंचवड, बिबवेवाडी, उंड्री, कोथरूड, वारजे या भागातही हलका ते मध्यम स्वरूपाच्या सरी बरसल्या.

तर जुन्नर तालुक्यातील आळेफाटा, वडगाव आनंद, पिंपरी पेंढार परिसरात जोरदार वारे व पाऊस आणि गारपीट झाली. त्यामुळे काही ठिकाणी झाडे पडल्याच्या घटना घडल्या. काढणीच्या अवस्थेत असलेल्या गहू, हरभरा, ज्वारी, कांदा, फळबागांचे नुकसान झाले.

पावसामुळे हवेत काही प्रमाणात गारवा तयार झाला होता. आंबेगाव तालुक्यातील साकोरे, चास, महाळुंगे पडवळ, कळंब, लौकी, चांडोली बुद्रूक आदी १० गावांत गुरुवारी दुपारी अवकाळी पावसाच्या सरी कोसळल्या. चास येथे जोरदार पावसाने हजेरी लावल्याने रस्त्यावर पाणी साचले होते.