IMD Alert : राज्यात कालपासून पावसाची उघडीप आहे. मात्र काही भागात ढगाळ वातावरण होते. पण मंगळवारी आणि बुधवारी राज्यातील काही भागात पावसाचा अंदाज असल्याचे हवामान विभागाने स्पष्ट केले. तर मिगजौम चक्रीवादळ उद्या दुपारपर्यंत आंध्र प्रदेशच्या नेलोर आणि मच्छलीपट्टणम दरम्यान धडकणार आहे.

बंगालच्या उपसागरातील ‘मिगजौम’ चक्रीवादळाची तीव्रता वाढत आहे. दक्षिण आंध्र प्रदेश आणि उत्तर तमिळनाडूच्या किनाऱ्याजवळ असलेले हे तीव्र चक्रीवादळ उद्या दुपारपर्यंत आंध्र प्रदेशच्या नेलोर आणि मच्छलीपट्टणम दरम्यान धडकणार असून, बपतला जवळ जमिनीवर येण्याचा इशारा हवामान विभागाने दिला आहे. या प्रणालीमुळे राज्यात ढगाळ हवामान झाले असून, विदर्भात पावसाची शक्यता आहे.

नैऋत्य बंगालच्या उपसागरातील ‘मिगजौम’ चक्रीवादळ सोमवारी तीव्र झाले असून, चक्रीवादळाचे केंद्र चेन्नईपासून ९० किलोमीटर पूर्वेकडे, तर नेल्लोरपासून १७० किलोमीटर आग्नेयेकडे, पदुच्चेरीपासून २०० किलोमीटर ईशान्येकडे, बपतला पासून ३०० तर मच्छलीपट्टणम पासून ५३० किलोमीटर आग्नेय दिशेला होते.

विदर्भातील काही भागात उद्या म्हणजेच मंगळवारी आणि परवा म्हणजेच बुधवारी काही भागात पावसाचा अंदाज आहे. मंगळवारी यवतमाळ, गोंदीया आणि गडचिरोली जिल्ह्यात काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज हवामान विभागाने दिला होता. तसेच बुधवारी यवतमाळ, नागपूर, चंद्रपूर आणि गडचिरोली जिल्ह्यात विजांसह हलक्या ते मध्यम पावसाचा येलो अलर्ट हवामान विभागाने दिला.