Parbhani Rain News : परभणी जिल्ह्याची जून ते ऑक्टोबर या कालावधीतील पावसाची (वार्षिक) सरासरी ८३८.९० मिमी आहे. मागील अकरा (२०१२ ते २०२२) पैकी ६ वर्षी सरासरीपेक्षा कमी, तर केवळ २ वर्षी सरासरीपेक्षा जास्त पाऊस झालेला आहे. गतवर्षी (२०२२) वार्षिक सरासरी पावसात ९.४६ टक्के तूट आली होती.

२०१९ पर्यंत परभणी जिल्ह्याची जून ते ऑक्टोबर या कालावधीत (वार्षिक) पडणाऱ्या पावसाची सरासरी ७७४.५९ मिमी होती. २०२० च्या मे महिन्यातील शासन निर्णयानुसार वार्षिक सरासरीमध्ये सुधारणा करण्यात आली आहे.

त्यानुसार जानेवारी ते डिसेंबर या कालावधीतील सरासरी ९३०.३० मिमी आहे. जून ते ऑक्टोबर या कालावधीतील सरासरी ८३८.९० मिमी आहे. मोसमी पावसाच्या कालावधीतील जून ते सप्टेंबर महिन्याची सरासरी ७६१.३ मिमी आहे. जिल्ह्यात मागील ११ पैकी २०१२, २०१४, २०१५ २०१७,२०१८,२०२२ या ६ वर्षात सरासरीपेक्षा कमी, तर २०१३, २०१६, २०१९, २०२०, २०२१ या ५ वर्षांत सरासरीपेक्षा जास्त पाऊस झाला.

त्यात २०२१ मध्ये ११९६.४० मिमी म्हणजेच १४२.६१ टक्के, सरासरीच्या तुलनेत ३५७.४ मिमी एवढा जास्त पाऊस झाला. तो सरासरी पावसाचा उच्चांक होता.

गतवर्षी (२०२२) जूनमध्ये सरासरी १४५.३ मिमीपैकी १३७.४ मिमी (९४.६ टक्के), जुलैमध्ये सरासरी २१९.२ मिमी अपेक्षित असताना प्रत्यक्षात ३१२.९ मिमी (१४२.७ टक्के), ऑगस्टमध्ये सरासरी २२७.८ मिमीपैकी ५९.५ मिमी (२६.१ टक्के), सप्टेंबरमध्ये १६९ मिमीपैकी १४०.७ मिमी (८३.३ टक्के), ऑक्टोबरमध्ये सरासरी ७७.६ मिमी अपेक्षित असताना प्रत्यक्षात १०८.९ मिमी (१४०.३ टक्के) पाऊस झाला.

जुलैमध्ये सततचा पाऊस, तर ऑगस्ट व सप्टेंबर महिन्यांत दीर्घ खंडामुळे उत्पादनावर परिणाम झाला. ऑक्टोंबरमध्ये जास्त पाऊस झाल्यामुळे काढणीच्या अवस्थेतील पिके भिजल्याने मालाच्या दर्जावर परिणाम झाला.

परभणी जिल्हा जून ते ऑक्टोबरमधील तुलनात्मक पाऊस स्थिती (मिलिमीटरमध्ये)

वर्ष - सरासरी - प्रत्यक्ष झालेला पाऊस- टक्केवारी

२०१२- ७७४.५९- ६३५.७ - ८२.०८

२०१३ -७७४.५९- ८८१.१८ - ११३.८५

२०१४- ७७४.५९ - ३५७.७३ -४८.१८

२०१५ - ७७४.५९ - ३४०.४६ - ४३.९५

२०१६ ७७४.५९ - ८३८.०९ - १०८.२६

२०१७- ७७४.५९- ५४६ - ७०.५०

२०१८ - ७७४.५९- ४६८.०१- ५९.४८

२०१९ - ७७४.५९ - ७९१.६- १०२.१९

२०२० - ८३८.९०- ९४०.९० - ११२.१४

२०२१- ८३८.९०- ११९६.४०- १४२.६१

२०२२- ८३९.९०- ७५९.३०- ९०.५१