Pune News : राज्यातील काही भागात पावसाळी वातावरण तर काही भागात उष्णतेची लाट, अशी परिस्थिती निर्माण झाली. विदर्भ चांगलाच तापत आहे. हवामान विभागाने विदर्भातील काही जिल्ह्यांमध्ये उष्णतेच्या लाटेचा इशारा दिला. तर काही ठिकाणी पावसाचाही अंदाज दिला. 

हवामान विभागाने आज अकोला, अमरावती, बुलडाणा, वाशीम आणि यवतमाळ जिल्ह्यात उष्णतेच्या लाटेचा इशारा दिला होता. तर धुळे, नंदूरबार, जळगाव, नाशिक, पुणे, कोल्हापूर, सातारा, छत्रपती लातूर, धाराशिव,  संभाजीनगर, जालना जिल्ह्यात काही ठिकाणी विजा आणि मेघगर्जनेसह हलक्या पावसाचा अंदाज दिला. तसेच मराठवाडा आणि विदर्भातील बहुतांशी ठिकाणी तापमान वाढेल, असाही अंदाज दिलाय. 

उद्या म्हणजेच शनिवारी नाशिक, हिंगोली, धाराशिव, लातूर, नागपूर, वर्धा, यवतमाळ जिल्ह्यात काही ठिकाणी हलक्या पावसाचा अंदाज आहे. तर अकोला, बुलडाणा, वाशीम आणि यवतमाळ जिल्ह्यात उष्णतेच्या लाटेचा इशारा दिला. 

देशातील बहुतांशी भागात तापमानात वाढ झाली. देशातील सर्वाधिक तापमानाची नोंद अकोला झाली. येथे ४२.६ अंश सेल्सिअस तापमान नोंदले गेले. तर देशातील अनेक भागात तापमानाचा पारा आता ४० अंशापार पोचला. तसेच तापमानात आणखी वाढ होऊ शकते, असा अंदाज हवामान विभागाने दिला.