Pune News : माॅन्सूनने आज देशातील आणखी काही भागात प्रगती केली. तर राज्यातील अनेक ठिकाणी हलक्या ते मध्यम पावसाने हजेरी लावली. हवामान विभागाने पुढील ४ दिवस राज्यभरात ठिकठिकाणी हलक्या ते मध्यम पावसाचा अंदाज दिला. 

हवामान विभागाने आज अरबी समुद्र, गुजरात, मध्य प्रदेश आणि राजस्थानच्या काही भागात प्रगती केली. माॅन्सूनने महाराष्ट्र दोन दिवसांपूर्वीच व्यापला आहे. माॅन्सूनची सिमा आज मुंद्रा, उदयपूर, शिवपुरी, सिध्दी, चैबसा, हल्दीया, पाकूर, साहीबगंज आणि रक्सौल भागात होती. 

माॅन्सूनच्या प्रगतीसाठी हवामान पोषक आहे. त्यामुळे पुढील ३ ते ४ दिवसांमध्ये माॅन्सून अरबी समुद्र, गुजरात, छत्तीसगड, पश्चिम बंगाल, झारखंड, बिहार आणि मध्य प्रदेशचा उर्वरित भाग व्यापेल. तसेच राजस्थान, उत्तर प्रदेश, उत्तराखंड, हिमाचल प्रदेश, जम्मू आणि काश्मीर, पंजाब आणि हरियाच्या काही भागात दाखल होईल, असाही अंदाज हवामान विभगााने व्यक्त केला. 

हवामान विभागाने पुढील ४ दिवस राज्यातील विविध भागात हलक्या ते मध्यम पावसाचा अंदाज दिला. तर काही ठिकाणी जोरदार सरी पडतील, अशीही शक्यता व्यक्त केली.

विदर्भात पुढील ४ ही दिवस ठिकठिकाणी हलक्या ते मध्यम पावसाचा येलो अलर्ट देण्यात आला. तर कोकण आणि मध्य महाराष्ट्रातही पावसाची शक्यता आहे. मराठवाड्यात तुलनेत पावसाचा जोर कमी राहण्याची शक्यता आहे.