Pune News: राज्यात माॅन्सूनने आज मोठी झेप घेतली. माॅन्सूनने आतापर्यंत संपूर्ण कोकण, मध्य महाराष्ट्र आणि मराठवाडा काबीज केला. तर विदर्भातील बहुतांशी भागही व्यापला. माॅन्सून पुन्हा सक्रीय झाल्याने राज्याच्या अनेक भागात पाऊही सुरु झाला आहे.

यंदा माॅन्सून राज्यात लवकर येण्याचा विक्रम झाला. माॅन्सून अपेक्षेपेक्षा लवकर आला. मात्र २६ मे रोजी राज्याचा निम्मा भाग व्यापल्यानंतर माॅन्सूनने एकाच जागेवर जवळपास २० दिवस मुक्काम केला होता. माॅन्सूनच्या वाटचालीसाठी पोषक वातावरण नसल्याने माॅन्सूनने प्रगतीच केली नव्हती. तसेच पावसानेही उघडीप दिली होती. मात्र हवामान पोषक होत असल्याने १४ जूनपासून राज्यात अनेक ठिकाणी पाऊस पडत आहे. कोकण आणि मध्य महाराष्ट्रातील काही ठिकाणी मुसळधार पाऊस पडला. मराठवाडा आणि विदर्भातही अनेक भागात जोरदार सरी झाल्या. 

पोषक हवामान असल्याने माॅन्सूनच्या वाटचालीसाठी अनुकूल स्थिती होती. त्यामुळे माॅन्सूनने आज राज्याचा बहुतांशी भाग व्यापला. माॅन्सूनने आज संपूर्ण कोकण, खानदेशसह संपूर्ण मध्य महाराष्ट्र, मराठवाडा व्यापला. तर विदर्भातही बहुतांशी भागात प्रवेश केला. माॅन्सूनने छत्तीसगड आणि ओडिशा राज्यातही आणखी काही भागात प्रगती केली. तसेच गुजरात आणि मध्य प्रदेशात प्रवेश केला. 

माॅन्सूनची सिमा आज गुजरातमधील वेरावल, भावनगर आणि वडोदरा तर मध्य प्रदेशातील खरगोन, महाराष्ट्रातील विदर्भ, छत्तीसगडमधील दूर्ग, ओडिशातील बारगर आणि चांदबली तसेच पश्चिम बंगालमधील बालूरघाट भागात होती. माॅन्सूनच्या प्रगतीसाठी पोषक हवामान आहे. त्यामुळे माॅन्सून पुढील २४ तासांत विदर्भाचा उरलेला भाग व्यापणार आहे. तसेच छत्तीसगड, ओडिशा, गुजरात आणि मध्य प्रदेशच्या आणखी काही भागात दाखल होईल.  

तर हिमालयाकडील पश्चिम बंगालचा भाग आणि सिक्कीमचा उरलेला भाग पुढील २४ तासांत माॅन्सून व्यापेल. तर पुढील २ दिवसांत माॅन्सून पश्चिम बंगालचा काही भाग, झारखंडचा काही भाग, बिहार आणि पूर्व उत्तर प्रदेशच्या काही भागात माॅन्सून दाखल होईल, असाही अंदाज हवामान विभागाने दिला.