Pune News : राज्यात वादळी पावसाला पोषक हवामान असल्याने ढगाळ हवामान होऊन, राज्याच्या कमाल तापमानात काहीशी घट झाली आहे. विदर्भातील वाशीम येथे राज्यातील उच्चांकी ४१.४ अंश सेल्सिअस तापमानाची नोंद झाली. तर शुक्रवारी आण शनिवारी राज्यातील काही भागात विजांसह पावसाचा अंदाज हवामान विभागाने दिला. 

हवामान विभागाने शुक्रवारी धुळे आणि नंदूरबार जिल्ह्यात विजांसह हलक्या पावसाचा अंदाज दिला. तर शुक्रवारी पालघर, धुळे, नंदूरबार, जळगाव, नाशिक, सोलापूर, छत्रपती संभाजीनगर, बीड, लातूर, धाराशिव या जिल्ह्यांमधील काही भागात विजांसह हलक्या पावसाचा अंदाज व्यक्त केला. 

मध्यप्रदेश पासून विदर्भ, कर्नाटक, दक्षिण तामिळनाडू पर्यंत हवेचा कमी दाबाचा पट्टा कायम आहे. राज्यात दिवसा उन्हाच्या झळा असह्य होत असतानाच रात्री देखील उष्ण ठरत आहेत. दुपारच्या वेळी उन्हाचा चटका चांगलाच वाढत आहे. यातच सकाळपासूनच असलेल्या ढगाळ हवामानामुळे वाढलेला उकाडा रात्रीच्या वेळी कायम राहत आहे.

मंगळवारी सकाळपर्यंतच्या २४ तासांमध्ये कर्नूल येथे देशातील उच्चांकी ४२.२ अंश सेल्सिअस तापमान नोंदले गेले. तापमानात चढ-उतार होत असला तरी राज्यात अनेक ठिकाणी तापमानाचा पारा ४० अंशांच्या वरच आहे. आज सोलापूर, धाराशीव, लातूर, नांदेड जिल्ह्यात तापमान चांगलेच वाढले होते.