Imd rainfall alert : राज्याच्या काही भागात कालपासून पाऊस हजेरी लावत आहे. पण सर्वदूर असा पाऊस नाही. आजही हवामान विभागाने विदर्भ आणि कोकणातील काही जिल्ह्यांना जोरदार पावसाचा येलो अलर्ट दिला. तर राज्याच्या इतर भागात ठिकठिकाणी हलक्या सरी पडतील, असाही अंदाज हवामान विभागाने दिला.

कालपासून कोकण, मध्य महाराष्ट्र, मराठवाडा, खानदेश आणि विदर्भात काही ठिकाणी हलक्या ते मध्यम स्वरुपाचा पाऊस झाला. पण पाऊस पडलेली  ठिकाणं खूपच कमी होती. सर्वदूर असा पाऊस नव्हता. हवामान विभागाने आजही राज्यातील काही जिल्ह्यांमध्ये ठिकठिकाणी जोरदार पावसाचा येलो अलर्ट दिला. विदर्भातील अकोला, अमरावती, यवतमाळ, चंद्रपूर आणि गडचिरोली या जिल्ह्यांमध्ये काही ठिकाणी विजांसह जोरदार पावसाचा अंदाज हवामान विभागाने दिला. तर कोकणातील रागयगड आणि ठाणे जिल्ह्यातही काही ठिकाणी अतिजोरदार पावसाचा येलो अलर्ट दिला.

याशिवाय खानदेश मराठवाड्यातील जिल्ह्यांमध्ये ठिकठिकाणी हलक्या ते मध्यम स्वरुपाच्या सरी पडतील, असा अंदाही हवामान विभागाने दिला. मध्य महाराष्ट्रातील सातारा आणि पुणे या जिल्ह्यांमध्ये ढगांच्या गडगडाटासह काही ठिकाणी जोरदार पावसाचा अंदाज आहे. कोकणातील सिंधुदुर्ग, रत्नागिरी आणि पालघर जिल्ह्यातही काही ठिकाणी ढगांच्या गडगडाटासह जोरदार पावसाचा अंदाज आहे.

उद्या राज्यात पाऊस कमीच राहण्याची शक्यता आहे. कोकणातील रत्नागिरी आणि रायगड जिल्ह्यात काही ठिकाणी अति जोरदार पावसाचा येले अलर्ट देण्यात आला. तर राज्याच्या इतर भागात ठिकठिकाणी हलक्या  ते मध्यम सरी पडू शकतात, असा अंदाजही हवामान विभागाने दिला.