Pune News : राज्यात उन्हाच्या चटक्याने काहिली वाढली आहे. सूर्य आग ओकत असल्याने सोलापूर आणि अकोला येथे यंदाच्या हंगामातील उच्चांकी ४४.४ अंश सेल्सिअस तापमानाची नोंद झाली आहे. आज (ता. ७) मराठवाड्यात वादळी वाऱ्यासह, विदर्भात गारपिटीसह पावसाचा इशारा (येलो अलर्ट) हवामान विभागाने दिला आहे. उर्वरित राज्यात उन्हाचा चटका तापदायक ठरण्याची शक्यता आहे.

रविवारी (ता. ५) सकाळपर्यंतच्या २४ तासांमध्ये अकोला येथे राज्याचे हंगामातील उच्चांकी ४४.३ अंश सेल्सिअस तापमानाची नोंद झाली. उन्हाचा चटका वाढल्याने मध्य महाराष्ट्रातील सोलापूर, विदर्भातील अकोला येथे ४४.४ अंश तापमान नोंदले गेले. चंद्रपूर, वर्धा येथे ४४ अंश, तर ब्रह्मपुरी, गडचिरोली, परभणी, अमरावती, वाशीम आणि नागपूर येथे ४३ अंश व त्यापेक्षा अधिक तापमानाची नोंद झाली.

पूर्व विदर्भापासून तेलंगणा, रायलसिमा, दक्षिण अंतर्गत कर्नाटक ते दक्षिण तमिळनाडूपर्यंत हवेचा कमी दाबाचा पट्टा विस्तारला आहे. राज्यात उकाडा कायम असून, वादळी पावसाला पोषक हवामान होत आहे. आज (ता. ७) मराठवाडा आणि विदर्भात वादळी वाऱ्यासह पूर्वमोसमी पावसाच्या सरी कोसळण्याचा, तर विदर्भातील यवतमाळ, चंद्रपूर, गडचिरोली जिल्ह्यांत गारपिटीचा इशारा देण्यात आला आहे. उर्वरित राज्यात उन्हाचा चटका, उकाडा कायम राहण्याची शक्यता आहे.

सोमवारी (ता. ६) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअस मध्ये) : पुणे ४०.३, धुळे ४२.०, जळगाव ४२.२, कोल्हापूर ३८.०, महाबळेश्वर ३३.१, मालेगाव ४२.८, नाशिक ३८.०, निफाड ३८.५, सांगली ४१.०, सातारा ४०.७, सोलापूर ४४.४, सांताक्रूझ ३४.७, डहाणू ३५.८, रत्नागिरी ३३.५, छत्रपती संभाजीनगर ४१.६, बीड ४२.०, नांदेड ४२.८, परभणी ४३.७, अकोला ४४.४, अमरावती ४३.६, बुलडाणा ३९.६, ब्रह्मपुरी ४३.९, चंद्रपूर ४४.२, गडचिरोली ४३.८, गोंदिया ४१.३, नागपूर ४३.०, वर्धा ४४.०, वाशीम ४३.२, यवतमाळ ४२.५.

वादळी पाऊस, गारपिटीचा इशारा (येलो अलर्ट) : यवतमाळ, चंद्रपूर, गडचिरोली.

वादळी पावसाचा इशारा (येलो अलर्ट) : लातूर, नांदेड, नागपूर, वर्धा, भंडारा, गोंदिया.

४३ अंशांपेक्षा अधिक कमाल तापमान असलेली ठिकाणे : सोलापूर ४४.४, अकोला ४४.४, चंद्रपूर ४४.२, वर्धा ४४, ब्रह्मपुरी ४३.९, गडचिरोली ४३.८, परभणी ४३.७, अमरावती ४३.६, वाशीम ४३.२, नागपूर ४३.