Pune News: विदर्भात जोरदार पावसाची बॅटींग सुरुच आहे. मागील ४ दिवस विदर्भातील अनेक भागात मुसळधार पाऊस झाल्याने पूरस्थिती निर्माण झाली आहे. काही गावांमध्येही पाणी शिरले. नागपूर जिल्ह्यात पावसाचा जोर अधिक आहे. हवामान विभागाने पुढील ३ दिवस विदर्भात जोरदार पावसाचा अंदाज दिला. 

नागपूर, भंडारा, गोंदीया, वर्धा, यवतमाळ आणि गडचिरोली जिल्ह्यात मागील ४ दिवसांपासून जोरदार पाऊस पडत आहे. काही गावांमध्ये नद्यांचे पाणी शिरल्याने पूरस्थिती निर्माण झाली. हवामान विभागाने आज अमरावती, नागपूर, भंडारा, गोंदीया, चंद्रपूर आणि गडचिरोली जिल्ह्यात काही ठिकाणी जोरदार पावसाचा ऑरेंज अलर्ट दिला. 

बुलडाणा, अकोला, वर्धा आणि यवतमाळ जिल्ह्यातही काही ठिकणी जोरदार पावसाची शक्यता आहे. मराठवाड्यातील जालना, परभणी, नांदेड आणि हिंगोली जिल्ह्यातही जोरदार पावसाचा येलो अलर्ट हवामान विभागाने दिला. मराठवाड्यातील इतर जिल्हे, मध्य महाराष्ट्र, खानदेश आणि कोकणात पावसाचा जोर कमी राहण्याची शक्यता आहे.

उद्या नागपूर, भंडारा, गोंदीया, चंद्रपूर आणि गडचिरोली जिल्ह्यात काही ठिकाणी जोरदार ते अतिजोरदार पावसाचा ऑरेंज अलर्ट हवामान विभागाने दिला. तसेच बुलडाणा, अकोला, अमरावती, वर्धा आणि यवतमाळ जिल्ह्यातही काही ठिकाणी जोरदार पावसाची शक्यता हवामान विभागाने वर्तविली. मराठवाडा, मध्य महाराष्ट्र आणि कोकणात काही ठिकाणी हलक्या ते मध्यम पावसाची शक्यता आहे. 

शनिवारी विदर्भातील अमरावती, वर्धा, नागपूर, भंडारा, गोंदीया, चंद्रपूर आणि गडचिरोली जिल्ह्यात तर जळगाव, छत्रपती संभाजीनगर जिल्ह्यातही काही ठिकाणी जोरदार पावसाचा येलो अलर्ट हवामान विभागाने दिला. मराठवड्यातील इतर जिल्हे, मध्य महाराष्ट्र आणि कोकणातही काही ठिकाणी हलक्या ते मध्यम सरी पडतील, असा अंदाज हवामान विभागाने दिला. 

रविवारपासून विदर्भातही पावसाचा जोर कमी होण्याची शक्यता आहे. विदर्भातील यवतमाळ, चंद्रपूर आणि गडचिरोली तसेच खानदेशातील नंदूरबार आणि धुळे जिल्ह्यात काही ठिकाणी जोरदार पावसाचा येलो अलर्ट हवामान विभागाने दिला. तसचे मराठवाडा, मध्य महाराष्ट्र आणि कोकणात काही ठिकाणी हलक्या सरी पडतील, असा अंदाज हवामान विभागाने दिला.