Maharashtra Rainfall Alert : राज्यात पावसाला पोषक हवामान झाल्याने तुरळक ठिकाणी हलक्या ते मध्यम पावसाच्या सरी कोसळत आहेत. आज (ता. २५) कोकणात तुरळक ठिकाणी जोरदार पावसाची शक्यता आहे. विदर्भात विजांसह पावसाचा इशारा देण्यात आला आहे. उर्वरित राज्यात ढगाळ हवामानासह हलक्या पावसाचा अंदाज हवामान विभागाने वर्तविला आहे.

मॉन्सूनचा आस असलेला कमी दाबाचा पट्टा फिरोजपूरपासून, कर्नाल, मेरठ, आझमगड, पटना, देवघर, डायमंड हार्बर ते पूर्व मध्य बंगालच्या उपसागरापर्यंत विस्तारला आहे. उत्तर प्रदेशपासून दक्षिण आसामपर्यंत समुद्रसपाटीपासून ९०० मीटर उंचीवर हवेचा कमी दाबाचा पट्टा सक्रिय आहे. दक्षिण उत्तर प्रदेशात चक्राकार वारे वाहत आहेत. दक्षिण कर्नाटकपासून तमिळनाडू ते कोमोरीन भागापर्यंत दक्षिणोत्तर हवेचा कमी दाबाचा पट्टा सक्रिय आहे.

उकाड्यात मोठी वाढ

राज्यात ढगाळ हवामानासह ऊन-सावल्यांचा खेळ सुरूच आहे. उकाड्यात मोठी वाढ झाली आहे. काही ठिकाणी हलक्या ते मध्यम सरी कोसळत आहेत. आज (ता. २५) कोकणात तुरळक ठिकाणी जोरदार पावसाची शक्यता आहे. विदर्भातील वर्धा, नागपूर, भंडारा, चंद्रपूर, गडचिरोली जिल्ह्यात विजांसह पावसाचा इशारा आहे. उर्वरित राज्यात हवामान ढगाळ हवामानासह तुरळक ठिकाणी हलक्या पावसाचा अंदाज हवामान विभागाने वर्तविला आहे.