Pune News : मध्य महाराष्ट्र, मराठवाडा, विदर्भात वादळी पावसाने हजेरी लावली असतानाच राज्यात उन्हाचा चटका वाढू लागला आहे. उत्तर महाराष्ट्रातील मालेगाव येथे कमाल तापमान ३८.२ अंशांवर पोचले आहे. यातच आज (ता. २) उत्तर महाराष्ट्र, मराठवाडा आणि विदर्भात तुरळक ठिकाणी वादळी पावसासह गारपीट होण्याचा इशारा हवामान विभागाने दिला आहे.

राज्याच्या विविध भागात वादळी पाऊस आणि गारपिटीने तडाखा दिल्याने रब्बी पिके, फळबागांचे नुकसान झाले आहे. राज्यात उन्हाळ्याची चाहूल लागली आहे. उन्हाचा चटका, उकाडा तापदायक ठरू लागला आहे. शुक्रवारी (ता. १) सकाळपर्यंतच्या २४ तासांत मालेगाव पाठोपाठ रत्नागिरी येथे ३८ अंश सेल्सिअस तापमानाची नोंद झाली आहे. तर जळगाव, सोलापूर, सांताक्रुझ, परभणी, वाशीम, यवतमाळ येथे कमाल तापमानाचा पारा ३७ अंशांच्या पार गेला आहे.

शुक्रवारी (ता. १) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :
पुणे ३६.० (२०.९), धुळे ३५.० (१४.५), जळगाव ३७.२ (१८.१), कोल्हापूर ३५.१ (२१.७), महाबळेश्वर २९.३ (१९.०), मालेगाव ३८.२ (२२.४), नाशिक ३६.४ (१९.४), निफाड ३४.६ (१५.५), सांगली ३५.७ (२१.७), सातारा ३६.३ (२१.२), सोलापूर ३७.८ (२४.४), सांताक्रूझ ३७.२ (२५.५), डहाणू ३२.७ (२१.६), रत्नागिरी ३८.० (२३.२), छत्रपती संभाजीनगर ३४.८ (१८.२), नांदेड ३५.६ (२१.८), परभणी ३७.० (२०.१), अकोला ३६.९ (२०.५), अमरावती ३५.६ (१९.४), बुलडाणा ३५.० (२२.५), चंद्रपूर ३३.६ (१८.२), गडचिरोली ३४.० (१८.४), गोंदिया ३३.७ (१८.४), नागपूर ३४.६ (१९.०), वर्धा ३६.१(१९.६), वाशीम ३७.२ (१९.२), यवतमाळ ३७.० (२०.५).

कमी दाबाचा पट्टा निवळला

उत्तर केरळपासून ते कोकणापर्यंत हवेचा कमी दाबाचा पट्टा निवळून गेला आहे. मात्र राज्याच्या विविध भागात ढगाळ हवामान होत असून, सायंकाळनंतर पाऊस पडत आहे. आज (ता. २) उत्तर महाराष्ट्रात, मराठवाडा आणि विदर्भात वादळी पाऊस, गारपिटीचा इशारा देण्यात आला आहे. कोकणातही तुरळक ठिकाणी विजांसह पावसाची शक्यता आहे.

वादळी पावसासह गारपिटीचा इशारा (येलो अलर्ट) :
जळगाव, संभाजीनगर, जालना, परभणी.
वादळी पावसाचा इशारा (येलो अलर्ट) :
धुळे, बीड, हिंगोली, नांदेड, अकोला, अमरावती, वर्धा, नागपूर, भंडारा, गोंदिया.