Weather Update Pune : राज्यात पावसाच्या दडीने उन्हाचा चटका तापदायक आहे. मॉन्सूनमध्ये मोठा खंड पडल्याने अनेक भागात पावसाची प्रतिक्षा आहे. आज (ता. ३०) कोकण, मध्य महाराष्ट्र, मराठवाड्यात जोरदार वारे, विजांसह पावसाची शक्यता आहे. उर्वरित राज्यात मुख्यतः पावसाच्या उघडिपीसह तुरळक ठिकाणी हलक्या सरींचा अंदाज हवामान विभागाने वर्तविला आहे.

मॉन्सूनचा आस असलेल्या कमी दाबाचा पट्टा हिमालयाच्या पायथ्याकडे कायम आहे. दक्षिण अंतर्गत कर्नाटक पासून कोमोरीन भागापर्यंत समुद्र सपाटीपासून ९०० मीटर उंचीवर हवेचा कमी दाबाचा पट्टा सक्रिय आहे.

उत्तर मध्य प्रदेशमध्ये समुद्रसपाटीपासून ५.८ किलोमीटर उंचीवर, तसेच पूर्व मध्य बंगालच्या उपसागरात समुद्र सपाटीपासून ४.५ ते ७.६ किलोमीटर उंचीवर उंचीवर चक्राकार वारे वाहत आहेत. राज्यात ढगाळ हवामानासह, ऊन सावल्यांचा खेळ सुरू आहे.

उकाड्याने अंगाची लाही लाही होत आहे. कोकणासह राज्यात तुरळक ठिकाणी एखादं दुसरी सर सुखावून जात आहे. आज (ता. ३०) कोकण, मध्य महाराष्ट्र, मराठवाड्यात ताशी ३० ते ४० किलोमीटर वेगाने वारे वाहून, विजांसह पावसाची शक्यता आहे.

उर्वरित राज्यात ढगाळ हवामानासह हलक्या पावसाची शक्यता हवामान विभागाने वर्तविली आहे.

विजांसह पावसाची शक्यता :

रत्नागिरी, रायगड, नगर, पुणे, सातारा, सांगली, सोलापूर, बीड, धाराशिव, लातूर, नांदेड.