भारतीय हवामानशास्त्र विभागाच्या अधिकृत अंदाजापूर्वी अपेकने एप्रिल ते जून दरम्यान सरासरी ते अधिक पावसाची शक्यता वर्तवली आहे. महाराष्ट्रातील कोकण, मध्य महाराष्ट्र, मराठवाडा आणि दक्षिण गुजरातसह काही भागांत मॉन्सूनपूर्व पाऊस पडण्याचा अंदाज आहे. मात्र, जम्मू-काश्मीर, हिमाचल प्रदेश, पंजाब आणि उत्तराखंडमध्ये पावसाची कमतरता राहू शकते. जुलै ते सप्टेंबरदरम्यान तामिळनाडू, केरळ आणि दक्षिण कर्नाटकसह गुजरात व दक्षिण राजस्थानच्या काही भागांत पाऊस कमी होण्याची शक्यता आहे. उर्वरित देशात सरासरीपेक्षा जास्त पावसाचा अंदाज आहे. एप्रिलमध्ये मध्य महाराष्ट्र आणि कर्नाटकमध्ये चांगला पाऊस पडण्याची शक्यता आहे. मे महिन्यात राजस्थान, पंजाब, हिमालयीन प्रदेश आणि बिहार-झारखंडसह काही भागांत पाऊस कमी राहू शकतो. जुलै आणि ऑगस्टमध्ये देशातील बहुतांश भागांत सरासरी ते अधिक पाऊस अपेक्षित आहे. सप्टेंबरमध्ये मध्य भारत आणि गुजरातमध्ये चांगला पाऊस पडण्याचा अंदाज आहे. मात्र, उन्हाळा तीव्र होत असून, बाष्पीभवनामुळे धरणांतील पाणीसाठा झपाट्याने कमी होण्याची शक्यता आहे.