बेदाणा दरातील तेजी मागील दोन महिन्यांपासून टिकून दिसत आहे. नव्या बेदाण्याला प्रति किलोस १०० ते २५० रुपये दर मिळत आहे. त्यातच देशभरातून बेदाण्याला मोठी मागणी आहे. बाजारातील वाढत्या आवकेमुळे कांद्याच्या भावावरील दबाव कायम आहे. देशातील महत्वाच्या कांदा उत्पादक राज्यांमधील बाजारांमध्ये आवक चांगली सुरु आहे. त्यामुळे सध्या कांद्याला बाजार समित्यांमध्ये सरासरी १ हजार ते १ हजार ४०० रुपयांच्या दरम्यान भाव मिळत आहे. सध्या उन्हाचा चटका वाढल्याने काकडीला चांगली मागणी आहे. राज्याच्या वेगवेगळ्या भागात काकडीला सध्या १ हजार १०० ते १ हजार ८०० रुपयांच्या दरम्यान भाव मिळत आहे. डोनाल्ड ट्रम्प यांच्या व्यापार युध्दामुळे सोयाबीनच्या आंतरराष्ट्रीय बाजारात चढ उतार दिसत आहेत. मागील आठवड्यात डाॅलरची मूल्य कमी झाल्यानंतर सोयाबीनचे भाव वाढले होते. बाजारात सोयाबीन ४ हजार २०० ते ४ हजार ५०० रुपयांच्या दरम्यान विकले गेले. आंतरराष्ट्रीय बाजारात कापसाच्या भावातही काहीसे चढ उतार सुरु आहेत. कापूस पुन्हा एकदा ६७ सेंट प्रतिपाऊंडच्या दरम्यान पोचला. देशातील बाजारात कापसाची आवक ४० हजार गाठींच्या दरम्यान पोचली. तर बाजारभाव ७ हजार ३०० ते ७ हजार ८०० रुपयांच्या दरम्यान आहेत.