राज्याचे कृषिमंत्री माणिकराव कोकाटे यांचे कार्यालय पुणे कृषी महाविद्यालयाच्या शताब्दी इमारतीत उभारले जात आहे. या कार्यालयासाठी पाच ते सहा खोल्या ताब्यात घेऊन नूतनीकरणाचे काम सुरू असून, त्यासाठी सुमारे दोन कोटी रुपये खर्च होणार आहेत. मात्र, कृषी परिषदेच्या ठरावाशिवाय हे काम सुरू केल्याने यावर वाद निर्माण झाला आहे. कृषी विद्यापीठाकडून अद्याप कोणताही अधिकृत प्रस्ताव मंजूर करण्यात आलेला नाही. विद्यार्थी, प्राध्यापक आणि विरोधी पक्षांनी या कार्यालयाच्या विरोधात भूमिका घेतली आहे. त्यांचा दावा आहे की, यामुळे महाविद्यालयातील शैक्षणिक वातावरण बिघडेल आणि राजकीय व्यक्तींचा वावर वाढेल. कृषी शिक्षण व संशोधन परिषदेचे उपाध्यक्ष तुषार पवार यांनी यासंबंधी कृषिमंत्र्यांची चर्चा करणार असल्याच सांगितल. कृषी भवन, साखर संकुल आणि अन्य पर्याय उपलब्ध असतानाही शताब्दी इमारतीचीच निवड का करण्यात आली, असा सवाल विचारला जात आहे. या प्रकरणाची चौकशी होणार का, आणि या कार्यालयासाठी झालेल्या खर्चाचे पुढे काय होणार, याकडे सर्वांचे लक्ष लागले आहे.