Punjab Farmer: कृषी मूल्य आणि किंमत आयोगाचे माजी अध्यक्ष अशोक गुलाटी यांनी सांगितले की, सरकारने कडधान्याबाबतचे आपले धोरण बदलले नाही तर २०३० पर्यंत कडधान्याची आयात ८ ते १० लाख टनांनी वाढू शकते. देशातील कडधान्य उत्पादन वाढीसाठी सरकारने पंजाब आणि हरियाना सारख्या एक पीक पध्दती असलेल्या राज्यात ५ वर्षाचा पीक बदलासाठी अनुदान द्यावे. या राज्यांमध्ये कडधान्याची उत्पादकता जास्त आहे. पंजाबने नुकतेच शेतकऱ्यांना भाताऐवजी इतर पिकांची लागवड करण्यासाठी एकरी ७ हजार रुपयांचे अनुदान जाहीर केले. केंद्राला जर वाटत असेल की पंजाब आणि हरियानातील शेतकऱ्यांनी कडधान्याचे जास्त उत्पादन घ्यावे तर केंद्रानेही एकरी ७ हजारांचे अनुदान शेतकऱ्यांना द्यावे. तसेच शेतकऱ्यांना १०० टक्के खरेदीची हमी द्याव, असेही गुलाटी यांनी सुचविले आहे.