Onion crop update: गेल्या आठवड्याभरात कांद्याच्या दरात थोडी सुधारणा दिसून आली आहे. मात्र, कांदा उत्पादक शेतकऱ्यांना पावसामुळे दुहेरी अडचणींना सामोरे जावे लागत आहे. पावसामुळे कांद्याचे मोठ्या प्रमाणावर नुकसान झाले असून त्याची गुणवत्ता देखील घटली आहे. पावसाचे आणि तापमानातील चढ-उतारांचे संकट अजूनही कायम असल्याने जून महिन्यात कांद्याची बाजारात आवक मर्यादित राहण्याची शक्यता आहे, ज्यामुळे दराला काहीसा आधार मिळू शकतो. गेल्या दोन आठवड्यांपासून बाजारात कांद्याची आवक पावसामुळे काहीशी कमी झाली आहे. त्यातही गुणवत्तेचा कांदा कमी प्रमाणात येत असल्यामुळे त्याचे दर वाढले आहेत. व्यापाऱ्यांच्या मते, पावसामुळे भिजलेला व खराब कांदा ३०० ते १२०० रुपये दरम्यान विकला जातो, तर चांगल्या गुणवत्तेच्या कांद्याचे दर १४०० ते १८०० रुपयांपर्यंत पोहोचले आहेत.