pulses import impact: मागील हंगामात तुरीचे दर वधारल्याने केंद्र सरकारने आयात खुले केली. यामुळे म्यानमार आणि आफ्रिकेतून मोठ्या प्रमाणावर तूर आयात सुरू झाली. यंदा या देशांतही चांगले उत्पादन झाले असून भारताने तुरीच्या आयातीसाठी कोणतेही शुल्क किंवा अटी न ठेवता ३१ मार्च २०२६ पर्यंत आयात खुली ठेवली आहे. परिणामी, गेल्या वर्षभरात तुरीची तब्बल १२ लाख ६४ हजार टन आयात झाली असून, ही आयात आतापर्यंतची सर्वाधिक असल्याचे आयातदारांचे म्हणणे आहे. केंद्राने यंदा १२ लाख टन तूर हमीभावाने खरेदीचे उद्दिष्ट ठेवले होते, त्यापैकी सुमारे ६ लाख टन खरेदी पूर्ण झाली आहे. यापूर्वी केवळ २०१७-१८ या वर्षी एवढ्या मोठ्या प्रमाणात खरेदी झाली होती. मागील दोन वर्षांत मात्र बाजारभाव हमीभावापेक्षा अधिक असल्यामुळे सरकारी खरेदी अपेक्षेप्रमाणे झाली नव्हती. यंदा मात्र भाव हमीभावाखाली गेल्याने खरेदी शक्य झाली. पण या साठवलेल्या तुरीचा साठा सरकार भविष्यात बाजारात आणेल, या शक्यतेमुळे बाजारावर भाव घसरणीचा दबाव निर्माण झाल्याचे तज्ज्ञांचे म्हणणे आहे.