rain update: मे महिन्यात पडलेल्या अधिक पावसामुळे जूनमध्ये पाऊस कमी होईल, या चर्चेमुळे शेतकऱ्यांमध्ये चिंतेचे वातावरण होते. मात्र आता हवामान विभागाने दिलासा देणारा अंदाज जाहीर केला आहे. यावर्षी जून महिन्यातही राज्यात चांगला, म्हणजेच सरासरीच्या १०८ टक्के पाऊस पडणार आहे. तसेच संपूर्ण मॉन्सून हंगामात म्हणजेच जून ते सप्टेंबर या काळात महाराष्ट्रात सरासरीच्या १०६ टक्क्यांपेक्षा अधिक पावसाचा अंदाज आहे. विशेष म्हणजे सर्वाधिक पाऊस मराठवाड्यात पडणार असून, तेथे सरासरीच्या ११२ टक्के पावसाचा अंदाज व्यक्त करण्यात आला आहे. विदर्भात १०९ टक्के, मध्य महाराष्ट्रात ११० टक्के, तर कोकणात १०७ टक्के पाऊस पडण्याची शक्यता हवामान विभागाने वर्तवली आहे. संपूर्ण देशाच्या पातळीवर पाहिल्यास, जून महिन्यात सरासरीच्या १०८ टक्के पावसाचा अंदाज आहे. कोरडवाहू भागांमध्येही चांगल्या पावसाची शक्यता असल्यामुळे शेतकऱ्यांना मोठा दिलासा मिळणार आहे.