उन्हाळ्यात जनावरांसाठी चाऱ्याची टंचाई निर्माण होतेचं.त्यामुळे सध्या जो चारा उपलब्ध आहे त्याचं व्यवस्थित नियोजन करुन चाऱ्याचा वापर करावा. त्यासाठी चारा कुट्टी करून जनावरांच्या शारीरिक गरजेनुसार द्यावा. विनाकारण जास्तीचा चारा जनावरांना देवू नये. गोठ्यातील जनावरांची त्यांच्या अवस्थेनुसार वर्गवारी करून त्यांना चाऱ्याची किती गरज आहे त्या प्रमाणातच चारा द्यावा. चारा जमिनीवर न टाकता गव्हाणीत द्यावा. जेणेकरून चारा तुडवून खराब होणार नाही. चारा टाकलेल्या गव्हाणीत मोठी जनावरं किंवा लहान वासरे जाऊन चारा खराब होणार नाही याची काळजी घ्यावी. कडब्याची पेंढी सोडून जशीच्या तशी जनावरांना खाण्यास न देता कुटटी करून द्यावी. एकाचवेळी जास्त चारा न टाकता विभागून द्यावा. जेणेकरून चाऱ्याचा जास्त अपव्यय होणार नाही. वाळलेल्या चाऱ्याचे खाण्याचे प्रमाण वाढवण्यासाठी गूळ आणि मीठ एक टक्का या प्रमाणात फवारून रात्रभर झाकून ठेवून सकाळी जनावरांच्या आहारात वापर करावा. यामुळे चारा न खाता वाया जाणार नाही.वाळलेल्या चाऱ्याचे पचन वाढवण्यासाठी प्रोबायोटिक्सचा जनावरांच्या आहारात वापर करावा.