Maharashtra Farmer: राज्यातील काही सीएससी शेतकऱ्यांकडून १०० ते २०० रुपये घेत असल्याचे प्रकार उघडकीस आलेत. त्यामुळं एक रुपयाची घोषणा असताना शेतकऱ्यांकडून शंभर दोनशे रुपये जादा उकळण्याचा प्रकार सुरूय. वास्तवात केंद्र चालकांना विमा अर्ज भरण्यासाठी प्रति शेतकरी ४० रुपये मानधन केंद्र सरकारनं निश्चित केलेलंय. म्हणजे एक अर्ज भरला की, सीएससी चालकांना विमा कंपनीकडून ४० रुपये दिले जातात. त्यामुळं शेतकऱ्यांनी अर्ज करताना १ रुपया देणे अपेक्षित आहेत. पण काही केंद्र चालक त्याला हरताळ फासत शेतकऱ्यांकडून जादा पैसे उकळत आहेत. अशा केंद्रावर सरकार कारवाई का करत नाही, असा शेतकऱ्यांच्या प्रश्न आहे. त्यामुळं एक रुपयात विमा नेमका आहे कुणासाठी? शेतकऱ्यांसाठी की, सीएससी चालकांसाठी? असा प्रश्न शेतकरी उपस्थित करू लागलेत. गेल्यावर्षी देखील १ रुपयांत विम्याची घोषणा केली पण सीएससी चालकांनी शेतकऱ्यांनी जादा पैसे उकळले होते. त्यावरून शेतकरी तक्रारही करत होते. पण कृषिमंत्री मुंडे मात्र कारवाईचा इशारा देत वेळ मारून नेली, असा आरोप शेतकरी करतात. सीएससी चालकांच्या मनमानी कारभाराला चाप लावण्याची गरज आहे.