Cotton Crop Care: पाणथळ जमिनीत फुले लागण्याच्या काळात जर पाणी साचून राहीलं, तर मोठ्या प्रमाणात पातेगळ होते. त्यामुळे पाणथळ जमिनीत कपाशी लागवड करण टाळाव. पेरणीची वेळ ही कपाशीमध्ये फार महत्त्वाची आहे. शक्यतो जून महिन्यात पेरणी उरकून घ्यावी. १५ जुलै नंतर पेरणी करू नये, कारण उशिरा पेरणी केलेल्या कपाशीमध्ये पातेगळीची जास्त समस्या येते. कपाशीमध्ये काटेकोरपणे पाणी व्यवस्थापन करणं आवश्यक आहे. कापूस वाढीसाठी वाफसा स्थिती आवश्यक असते. त्यामुळे शक्यतो कपाशी पिकासाठी ठिबक सिंचन करावं. शेतात पाणी साचू देऊ नये किंवा जास्त काळ पाण्याचा ताण पडणार नाही, याची काळजी घ्यावी. पिकात अन्नद्रव्यांच प्रमाण कमी झालं की पातेगळ होते. त्यामुळे माती परीक्षण करून त्याच्या अहवालाप्रमाणे शिफारशीत खतमात्रा देणं गरजेचं असतं. विशेष करुन खतामध्ये नत्रयुक्त खतांची मात्रा ३ ते ४ हप्त्यांमध्ये विभागून द्यावी. अनेक शेतकरी सुरवातीला जास्त युरियाचा वापर करत असल्यामुळे झाडांची शाकीय वाढ जास्त होते. मात्र उत्पादनामध्ये घट येते.